Елімізде қолға алынған жаңа саяси және экономикалық реформалар Абу Дабиде өткен сарапшылар және БАҚ өкілдерінің басқосуына арқау болды. Қазақстан елшілігі ұйымдастырған жиын Президент Жолдауында көзделген мақсат-міндеттерге арналды.
Дөңгелек үстелде қатысушылар екі ел арасындағы саяси және экономикалық бастамалар мен серпінді жобаларға тоқталып, Жолдаудың басым бағыттарын сөз етті. Соның ішінде бір палаталы парламентке көшу, жасанды зерде мен цифрлық даму мәселелері жөніндегі жеке ведомство құру, экономиканы әртараптандыру және көлік-логистика инфрақұрылымын дамытудың мән-маңызы ескерілді.
Жолдауды жүзеге асыру шетелдік серіктестер мен инвесторлар үшін бірлескен жобаларға кең мүмкіндік ашатыны айтылды. Жергілікті қауымдастық бұл өзгерістерге қызығушылық танытып, Қасым-Жомарт Тоқаев көтерген мәселелердің қай-қайсы да өзекті екенін алға тартты.
Абдулрахим Абдулвахид, «Media Hub International» ұйымының бас директоры:
- Жолдаудағы көптеген мәселе қазір әлемде болып жатқан өзгерістер мен түбегейлі бетбұрысты шешімдерді айқын көрсетіп берді. Бұл құжат Қазақстан мен Әмірліктер арасындағы ақпараттық технологиялар мен цифрлық коммуникациялар саласындағы ынтымақтастықты дамыту үшін кең мүмкіндіктер ашады.
Жиынға қатысушылар саяси және экономикалық тұрғыда маңызды құжаттың жаһандық сын-қатерлерге төтеп бере алатынын жеткізді. «Бір есептен бұл Қазақстан мен әмірліктер арасындағы стратегиялық серіктестік ұстанымдарына толықтай сай», — деді мамандар. Әсіресе, жасанды зерде саласын дамыту мен ақпараттық технология ісіндегі ынтымақтастық кең тыныс алуы мүмкін. Осы арқылы екі ел сенімді серіктестіктің жаңа кезеңіне қадам басады.
Хусния Әл Али, БАӘ ұлттық кітапханасы мен архивінің білім беру жөніндегі кеңесшісі:
- Қазақстанда білім беруді цифрландыру мен жаңа заманға сай кадр даярлау мәселесі көтеріліп отыр. Ол өте маңызды. Президенттеріңіздің бұған басымдық бергені өте орынды дер едім. Қазақстанның цифрлық экожүйелерді қалыптастыру тәжірибесі әмірлік үшін де пайдалы болады.
Халед Мубарак Әл Кенди, «Emirates Global Education Investment Group» сараптамалық білім беру орталығының бас директоры:
- Жолдауда Адам капиталын дамытуға және инновацияларды енгізуге айрықша басымдық берілген екен. Осы бағытқа бірлесіп күш жұмылдыра аламыз деген ойдамын. Бірлескен білім беру және инвестициялық жобалар жүзеге асуы ықтимал.
