Алматыда көпшілік ашу-ызаға булықтырған жағдай тіркелді, деп хабарлайды Skifnews.kz ақпарат порталы.

2018 жылы желтоқсанда көлік жүргізушісі жол апатынан үш адамның өмірін қиды. Бір әйел мүгедек болып қалды. Сот айыптыға 10 жылға жаза кескен. Бірақ бүгін ол қылмыскер жазасын өтеудің орнына қаладағы мейрамханалар мен сауда орталықтарында емін-еркін жүргені анықталды. Қаза тапқандардың туыстарының айтуынша, айыпталушы жазаға лайықты түрде отырмай, «ең жақсы өмірін» сүріп жүр. Олар: «4 отбасы қайғыдан қан жұтып отырғанда, ол адам ештеңе болмағандай өмір сүріп жүр. Бұл қалайша әділеттілік болады?» – деп ашынып отыр. Әлеуметтік желіде де халықтың ашуы өршіді.

– «Егер адам 10 жылға сотталған болса, оның бостандықта жүруі – заңға деген сенімді күйрету», – деп жазды бір тұрғын.

– «Қылмыскер отыруы керек, қалада серуендемеуі тиіс», – деді тағы бірі.

Марқұмдардың туыстары ақшаға келіспегенін айтады.

«Бізден “ақша алып қойды” деп өсек таратты. Бірақ шындық басқа – біз ешқандай ақша алмаймыз, тек әділ жазасын өтесін дедік», – дейді олар.

Қоғам белсенділері Бас прокуратура мен ҚАЖ комитетінен ресми жауап күтуде. Қарапайым халық үшін бір заң, ал танысы барларға екінші заң жүруі – ел сенімін шайқалтатыны анық.