Жаңа оқу жылы қарсаңында Арал ауданының Тоқабай ауылында 100 орындық мектеп ашылды. Бұрынғы білім ошағы апаттық жағдайға жетіп, ауылдықтарды алаңдатқалы біраз болып еді. Байырғы жұрттағы осы мәселе талқыға түскен тұста ауылдағы білім ошағы демеушілік есебінен салынатыны туралы байлам жасалған. Былтыр негізгі оқу корпусы салынып, жақында құрылыс толық аяқталды. Енді Тоқабайдағы оқушылар мәжіліс залы, кітапханасы мен асханасы, спорт залы бар мектепте білім алады.

Оның ашылуында облыс әкімі Нұрлы­бек Нәлібаев ауыл тұрғындарын игі бастаманың іске асуымен құттықтады.

«Бұған дейінгі салынған мектеп ғима­ра­тының сапасы сын көтермей, апатты жағдайда деп танылғандықтан, ауыл балалары уақытша әкімдік ғимаратында білім алып келді. Осы жағдайды ескеріп, өткен жылы демеушілік есебінен мектеп ғимаратын қайта салуды қолға алған болатынбыз.

Өңірімізде әрбір баланың шығар­ма­шылықпен, спортпен айналысуына мемлекет тарапынан барлық мүмкіндік жасалып отыр. 2022 жылдан бері өңірімізде жаңадан 15 мәдениет нысаны бой көтеріп, ел игілігіне берілді. Ассамблеяның 30 жылдығы аясында «Қазатомөнеркәсіп» ұлттық атом компаниясының» қолдауымен Достық үйінің жаңа ғимараты бой көтеріп келеді. Нысан алдағы қараша айында пайдалануға беріледі. Кейінгі үш жылда 20 спорт кешені іске қосылды. Биыл тағы 6 спорт ке­шені келушілерге қызметін бас­тайды. Биыл «Қазақстан халқына» қо­рының қол­дауымен Шиелі, Жалағаш аудан­­дарында жаңа спорт кешендері табыс­­талды. Қор­дың демеушілігімен мүм­кіндігі шектеулі жандарға арналған дене шынықтыру-сауық­тыру кешені салынып жатыр.

Жаңа оқу жылында шәкірттерге табыс, ұстаздарға шығармашылық шабыт, ата-ана­ларға қуаныш тілеймін!» деді облыс әкімі.

Жиында өңірдің әлеуметтік-экономи­калық дамуына үлес қос­қан азаматтар Қызылорда облысының Құрмет грамотасымен, облыс әкімінің Алғыс хатымен марапатталды.

Облыста білімге бөлінетін қаржы көлемі жыл санап артып келеді. Биыл сала бюджеті 346 млрд 800 млн теңгеге жетті. Қайтарылған активтер есебінен 8 млрд 200 млн теңгеге 5 мектептің құрылысы қаржыландырылады.

Қосымша білім жүйесін дамыту мақсатында үш жылда 4 «Оқушылар үйі» мен 2 «Өнер мектебі» салынып, жас ұрпақтың жан-жақты болып өсуіне жағдай жасалды. Өткен жылы «ҚазМұнайГаз» ұлттық компаниясының демеушілігімен заманауи «Оқушылар сарайы» ашылды. Балалар мен жасөспірімдерге арналған «Сыр жұлдыздары» шығармашылық-инновациялық академиясы жыл ортасында пайдалануға берілді. Ал жаңа оқу жылы қарсаңында Шиелі ауданында «Оқушылар үйі» мен «Өнер мектебі» салтанатты түрде ел игілігіне табысталды.

Қазір қайта жаңғыртылып жатқан Президент саябағынан жылдың төрт мезгілінде жұмыс істейтін 300 орындық тынығу лагері, Ботаникалық білім орта­лы­ғы бой көтеріп жатыр.

Аралда аудан орталығынан кейін тұр­­ғындарының саны көп елді мекеннің бірі – Сексеуіл кенті. Төрт мектебі бар үлкен кентте тағы бір білім ошағы есігін айқара ашты. Үш жүз орындық «Келешек мектебінің» ашылу рәсіміне Парламент Сенаты мен Мәжілісі депутаттары Наурыз­бай Байқадамов, Руслан Рүстемов, Мұрат Әбенов, Мұрат Ергешбаев, «Қазақстан халқына» қоғамдық қорының басқарма төрағасы Ләззат Шыңғысбаева мен зиялы қауым өкілдері қатысты.

Облыс әкімі тұрғындарды жаңа мек­тептің ашылуымен құттықтап, білім саласындағы жетістіктерге тоқталды.

Өңірде 2023 жылдан бері облыстық бюджет есебінен 5 млрд 700 млн теңгеге 9 мектеп жанынан 2 900 орындық қосымша ғимарат салыныпты. Осының арқасын­да үшауысымдық мектептер мәселесі түбе­гейлі шешімін тауып отыр. Биыл облыстық бюджеттен 2 млрд 400 млн теңге бөлініп, 9 мектеп қайта жаңғыртудан өтті. Кейінгі үш жылда 15 мектеп ғимаратына күрделі жөндеу жүргізіліп, апатты жағ­дайдағы 7 мектептің мәселесі толық шешімін тапты.

Өңірде білім саласын дамытуға түрлі қорлар да үлес қосып келеді. Соның бір дәлелі – Қызылорда қаласынан «Білімді қолдау қоры» арқылы 8 млрд 400 млн теңгеге салынған дарынды бала­ларға арналған физика-математика бағытындағы мектеп-интернат. Мұнда оқу үшін еліміздің 17 өңірінен 1 445 оқушы өтініш білдіріп, жоғары көрсеткіштерге қол жеткізген 200 бала қабылданды. Осы қор есебінен Арал ауданындағы Мерген­сай елді мекенінде 2 млрд 333 млн теңгеге 150 орындық заманауи мектеп құры­лысы жүріп жатыр.

Өңіріміздегі апатты деп танылған 3 білім ордасын республикалық бюджет есебінен жаңадан салу жоспарланып отыр. Облыста өткен жылы 31 млрд 800 млн теңгеге 13 білім ұйымы жаңадан ашылды.

Жиында «Қазақстан халқына» қоғам­дық қорының басқарма төрағасы Ләззат Шыңғысбаева сөз сөйлеп, өңіріміздің әлеуметтік-экономикалық дамуына үлес қосқан азаматтар марапатталды.

Қызылорда облысы,

Арал ауданы