10 тамызда Алматыдағы Орталық стадионда әлемдік жұлдыз Дженнифер Лопестің концерті өтті. Концерттен кейін еріктілерге қатысты дау шықты, — деп хабарлайды Massaget.kz тілшісі.

Балалардың құқықтарын қорғау комитеті осы жайтқа пікір білдірді.

"Балалардың құқықтарын қорғау комитеті голливуд жұлдызының концерті аясында кәмелетке толмағандардың волонтёрлік қызметі кезінде олардың еңбек құқығы бұзылуы мүмкін деген өтінішті қарастырып жатыр. Мәселені жергілікті атқарушы орган, Алматы қаласының прокуратурасы зерттеп жатыр", — деді комитет өкілдері.

Комитет мәліметінше, жасөспірімдер заң аясында ғана жұмыс істей алады. 14-16 жастағылар аптасына 24 сағаттан, 16-18 жастағылар 36 сағаттан артық жұмыс істемеуі керек. Міндетті түрде ата-ананың немесе заңды өкілдің жазбаша келісімі қажет.

Айта кетейік, Дженнифер Лопестің Алматыдағы концертінен кейін кейбір еріктілер әлеуметтік желілерде коммерциялық іс-шарада жағдай жасалмаса да, жұмыс істеуге тура келгеніне шағымданды.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!