Биыл елде жаңадан тағы 10 шетелдік оқу орнының филиалы ашылады.

Қазір 6 мыңнан астам студент 20-дан астам шетелдік оқу орнында білім алып жүр. Жалпы кейінгі жылдары өзге елдің университеттеріне қызығушылық артып келеді. Енді бұның себебі неде?

Сержан Айтжан, тілші:

- Шетелдік оқу орнында оқу үшін шекара асудың қажеті жоқ. Себебі Қазақстанда да халықаралық деңгейде білім алу мүмкіндігі бар. Мысалы, елде Ұлыбритания, АҚШ, Корея, Ресей мен Түркия сынды ғылым алпауыттарының оқу орындары жұмыс істеп тұр.

Иә отандық талапкерлерге қолайлы жағдай мен шетелдік диплом ұсынады. Және ең бастысы — өз елінде білім алып, әлемдік еңбек нарығына шығуға мүмкіндік береді. Солардың бірі Ковентри университетінде 11 мамандық бойынша оқу бағдарламасы қарастырылған .

Мөлдір Еспенбетова, талапкерлерді қабылдау бөлімінің маманы:

- Астана қаласында біз кампусты 24-жылы ашқан болатынбыз. Қазіргі таңда бизнес, компьютерлік ғылымдар, экономика және қаржы, халықаралық қатынастар деген 4 факультет бойынша талапкерлерді қабылдауды жүргізіп жатырмыз. Мемлекеттік гранттар осы биылғы оқу жылына бөлінген болатын. 200 грант. Бізге 760 талапкер өтініш қалдырған болатын. Ақпан, наурыз айларында қабылдадық. Соның арасынан топ 200 студентті таңдап алған болатынбыз.

Егер шетелдік университет отандық жоғары оқу орнының базасында ашылса, студенттерге қос диплом алу мүмкіндігі туады. Сонымен қатар, шетелде оқуын жалғастыра алады. Ал жеке кампуста орналасса, тек шетелдік білім ордасының дипломына қол жеткізеді.

Толқын Ізмахан, профориентолог:

- Бұл қос дипломды білім беру бағдарламасында педогогикалық мамандықтар, ғылыми мамандықтар және аити бағыты бойынша гранттар бөлінген. Мысалы, Қозыбаев университетінде 3 жарым жыл оқитын болса, қалған жарты жыл, 1 семестрді сол Аризона университетінде оқып, 2 университеттің алуға мүмкіндігі бар.

Елімізде шетелдік жоғары оқу орындарымен 30-дан аса стратегиялық серіктестік бар, оның 24-і қазір жұмыс істеп тұр. Бұл білім ордалары өңірлерге теңдей бөлініп, аймақтардағы кадр даярлау ісін күшейтуге бағытталған.

Руслан Емелбаев, ҚР Ғылым және жоғары білім министрінің кеңесшісі:

- Бізде Қазақстанда тарихи, негізгі ірі жоғарғы оқу орындары Алматы мен Астанада орналасқан ғой. Ал бұл филиалдардың басым бөлігі өңірлерде ашылып жатыр. Бұл жердегі басты мақсат сол өңірлердегі ғылымның, сонымен қатар жоғары білімнің дамуына жаңа бір серпіліс беру мақсатында болып отыр. Ашылып жатқан кезде де сол өңірдің экономикалық және әлеуметтік жағдайы да міндетті түрде ескерілуде.

Шетелдік университеттердің желісі кеңейіп келеді. Олар отандық жоғары оқу орындарының базасында ашылып, бірлескен бағдарламалар ұсынады. Мұндай серіктестіктер білім сапасын арттыруға үлкен үлес қосатыны анық.

Сержан Айтжан, Асхат Қарақойшиев