Шілде айында азық-түлік арзандады.

Бұл туралы Премьер-Министрдің орынбасары — Ұлттық экономика министрі Серік Жұманғариннің төрағалығымен өткен жиында айтылды. Сауда және интеграция бірінші вице-министрі Айжан Бижанованың мәліметіне сүйенсек, сәбіз бағасы 9,1 пайызға, картоп 7,9 пайызға, пияз 1,8 пайызға төмендеді. Сондай-ақ күріштің бағасы 0,6 пайызға, жұмыртқа 0,1 пайызға түсті. Ал әлеуметтік маңызды тауарлар тізіміне кіретін нан, макарон және сүт өнімдерінің құны өзгерген жоқ.

Әлеуметтік маңызы бар азық-түлік бағасы

Сәбіз – 9,1%

Картоп – 7,9%

Пияз – 1,8%

Күріш – 0,6%

Жұмыртқа – 0,1%

Дегенмен кейбір өнімнің қымбаттағаны байқалды. Мәселен, қырыққабат бір айда 12,3 пайызға шарықтағанымен, шілденің соңғы аптасында баға ептеп арзандады. Тауық еті 2,6 пайызға, сиыр еті 1,4 пайызға қымбаттады. Бұған дейін күнбағыс майы нарығын реттеу мақсатында Майлы дақылдар өңдеушілер ассоциациясымен келісім жасалған еді. Ал жиында көкөніс пен жеміс бағасын төмендету мақсатында Қырғызстан, Өзбекстан және Түрікменстан шекараларында «жасыл дәліз» ұйымдастыру тапсырылды.