Қазақстан көлік-транзиттік әлеуетті дамытуға күш салып келеді. Бүгінде ел аумағынан 13 халықаралық көлік дәлізі өтеді, деп хабарлайды 24kz.

Оның ішінде бесеуі теміржол және 8 автомобиль дәлізі бар. Осы арқылы Қытайдан Еуропаға 1,5-2 ай жүретін жүк небәрі екі аптада жетеді.

Айта кеткен жөн, тәуелсіздіктің алғашқы жылдары Ресей, Өзбекстан, Қырғызстан және Түрікменстан сияқты көрші елдерге ғана жүк тасымалдау мүмкін болатын. Ал бүгінде Қазақстан Еуразияның көлік хабына айналды. Еуропа – Батыс Қытай, Транскаспий дәлізі, Құрық пен Ақтау порттары арқылы Қазақстан Қытай, Түркия, Грузия, Әзербайжан, Германия, Нидерланд сынды ондаған елмен тікелей байланыс орнатты. Еліміз жаһандық саудада ерекше маңызы бар мемлекетке айналып отыр.

Елде шамамен 3 мың шақырымға жуық жаңа темір жол салынды. Автожол саласын дамыту бойынша да ауқымды жұмыстар жүргізілуде. Бүгінде жалпыға ортақ пайдаланылатын автомобиль жолдарының ұзындығы 96 мың шақырымға жетеді. Оның 25 мыңы республикалық, ал 71 мың шақырымы жергілікті маңызы бар жолдар.