Бұл қызмет толық автоматтандырылған және пайдаланушыларға тегін көрсетіледі.

Енді қосымша білім беру саласындағы қызметтің басталғаны немесе тоқтатылғаны туралы міндетті хабарламаны онлайн түрде elicense.kz порталы арқылы жолдауға болады. Бұл қызмет толық автоматтандырылған және пайдаланушыларға тегін көрсетіледі. Бұл туралы "Ұлттық ақпараттық технологиялар" компаниясының баспасөз қызметі хабарлады.

Жаңа жүйе арқылы тіл курстары, балаларға арналған білім беру орталықтары, студиялар мен секциялар сияқты мектептен тыс мекемелерді ашу немесе жабу туралы заңнамада көзделген міндетті хабарламаны бірнеше қадамда жіберуге мүмкіндік бар. Бұл процесті аяқтағаннан кейін ғана балаларға қосымша білім беру қызметін бастауға рұқсат беріледі.

Хабарлама беру үшін мынадай қадамдарды орындау қажет:

• elicense.kz порталына кіріп, авторизациядан өту;
• «Білім» бөлімінен «Қосымша білім беру саласындағы қызметтің басталғаны немесе тоқтатылғаны туралы хабарлама» қызметін таңдау;
• өтінімді толтырып, қажет болған жағдайда құжаттарды тіркеу;
• өтінімді электронды қолтаңба немесе басқа қолжетімді әдіспен растау.

Өтініш жіберілген бойда құжат автоматты түрде қалыптасып, пайдаланушының жеке кабинетінде «Менің хабарламаларым» бөлімінде көрсетіледі. Мемлекеттік орган тарапынан қосымша өңдеуді күтудің қажеті жоқ.

Бұл қызмет Қазақстанның бүкіл аумағында қолжетімді және кәсіпкерлерге уақыт үнемдеуге мүмкіндік береді.

Алайда, хабарламаны жолдау үшін алдымен эпидемиологиялық тұрғыдан елеусіз объектіні пайдалануды бастау немесе тоқтату туралы хабарламаны рәсімдеу қажет. Бұл құжат мекеменің санитарлық талаптарға сәйкестігін және білім беру қызметін көрсетуге жарамды екенін растайды.

Оқи отырыңыз:

• Қазақстанда спорт, өнер және қосымша білім бойынша бірыңғай ваучер енгізіледі
• Қазақстан оқушылары қосымша біліммен қанша пайыз қамтылған