2025 жылдың маусым айынан бастап "Саламатты Қазақстан" медициналық пойызы Батыс Қазақстан облысында жұмысын бастады. Пойыз ұжымы Шыңғырлау, Тасқала аудандары мен Бәйтерек ауданының 6 теміржол станциясының жанында тұратын шалғай ауыл тұрғындарына кәсіби көмек көрсетті, деп хабарлайды БҚО әкімдігінің баспасөз қызметі.

Бүгін, 9 шілдеде пойыз Теректі ауданына келді. Аудан тұрғындарына Жайық және Алғабас станцияларында 4 күн бойы қызмет көрсетеді.

"Саламатты Қазақстан" медициналық пойызы Қазақстан президентінің жанындағы Әйелдер істері және отбасылық-демографиялық саясат жөніндегі ұлттық комиссияның, "Самұрық-Қазына" АҚ компаниялар тобы мен Қазақстан Денсаулық сақтау министрлігінің атынан Samruk-Kazyna Trust қорының серіктестігі арқасында елімізде табысты іске асырылуда.

Медициналық пойыз ұжымын, дәстүр бойынша, жергілікті билік органдары мен ауыл халқы жылы ықыласпен қарсы алды. Аудан халқының атынан пойыз ұжымына Теректі ауданы әкімінің м.а. Д.С.Гумаров ризашылығын білдіріп, жұмыстарына сәттілік тіледі.

Сонымен қатар салтанатты қарсы алу шарасына облыс әкімі аппаратының бас инспекторы, Батыс Қазақстан облысы әкімі жанындағы әйелдер істері және отбасылық-демографиялық саясат жөніндегі комиссияның хатшысы Т.В.Рогозина, аудандық аурухананың директорының м.а. С.Ж.Сағидуллин, облыстық қоғамдық даму басқармасы басшысының орынбасары, Батыс Қазақстан облысы әкімі жанындағы Әйелдер істері және отбасылық-демографиялық саясат жөніндегі комиссияның мүшесі Г.Б.Шөкеева, аудандық ардагерлер кеңесінің төрағасы М.Ғ.Қазиев және басқалар қатысты.

Пойыздың аға дәрігері А.Ж. Саханова ауыл тұрғындарына "Мобильді ұжымның" жұмыс механизмін мұқият түсіндіріп, пациенттерді қабылдайтын, сондай-ақ үйде қызмет көрсету үшін шығатын дәрігерлер бригадалары жұмысын бастап кетті.

"Жұмыс барысында медицина қызметкерлерімен қатар, ауыл тұрғындарына еңбек дауларын шешуге, әлеуметтік төлемдер алуға өтінім беруге, қолданыстағы заңнама нормаларының қолданылуын түсіндіруге және басқа да азаматтық мәселелер бойынша заңгер мен медиатор кеңес береді",- деп түсіндіріп өтті пойыз медиаторы Ш.А.Шалғазина.

"Біз пойыздың барлық қызметкеріне, дәрігерлерге, медиаторларға, заңгерлерге — олардың кәсібилігі, қамқорлығы мен зейіні үшін алғыс айтамыз. Сіздердің игі істеріңізге сәттілік тілейміз", — деп Теректі ауданының тұрғыны, ақсақал З.С.Сәлімгереев ризашылығын білдірді.

Жайық станциясындағы жұмыс 9-10 шілде, ал Алғабас станциясында 11-12 шілдеде өтеді. Жұмыс режимі сағат 9.00-ден 18.00-ге дейін.

Биыл 12 шілдеде кешке "Саламатты Қазақстан" медициналық пойызы Батыс Қазақстан облысының аумағынан кетеді.

Мәтіннен қате тапсаңыз, бізге жазыңыз