Түркістанда шахматтан «Senat Open» екінші ашық кубогының «Оңтүстік аймақ» жартылай финалы басталды, деп хабарлайды 24KZ. Турнирге Жамбыл, Қызылорда, Түркістан облыстары мен Шымкенттен үздік 140 ойыншы қатысып жатыр. Бәрі – өз өңірлерінде іріктеуден топ жарғандар.

Жартылай финал швейцарлық жүйе бойынша 9 турдан тұрады. Бүгінгі ойынның қорытындысы бойынша ала тақта шеберлерінің арасынан 38 жеңімпаз финалға жолдама алады. Олар 29 тамызда Астанадағы финалдық сайыста оңтүстік өңірдің намысын қорғайды.

Сағындық Абызов, жарысқа қатысушы:

- Жекелей өз басыма келетін болсам, мен облыстық чемпион болған адам емеспін. Ауданаралық жарыстарда 1-2-ші орындарға ілігіп жүрміз. Өйткені біздікі әуесқойлық қой. Бұның оқуын бітірген емеспін, бірақ өзім үйреніп, қатысып жатырмын.

Александр Бабенко, Қазақстан шахмат федерациясының вице-президенті:

- Бізді Қазақстанда шахмат ойынының дамып келе жатқаны қуантады. Жақында ғана Лондонда өткен әлем чемпионатында қазақстандық арулар күміс жүлдеге ие болды. Жастар мен жасөспірімдеріміз де Азия мен әлемде алдыңғы қатардан көрініп жүр. Бұл бекзада ойынның біздің елде болашағы жарқынын екенін көрсетеді.