Копенгагенде Қазақстан Республикасының Швециядағы Елшілігі (Данияда қоса атқарушы) мен Дания өнеркәсібі конфедерациясы (DI) бірлесе ұйымдастырған қазақ-дат іскерлік дөңгелек үстелі өтті, деп хабарлайды inbusiness.kz сайты.

Қазақстандық делегацияны ҚР Сыртқы істер министрінің орынбасары Ә. Қуантыров басқарды. Делегация құрамына Қазақстан Республикасы Ауыл шаруашылығы министрлігі мен Өнеркәсіп және құрылыс министрлігінің өкілдері, сондай-ақ "Бәйтерек" ҰБХ" АҚ, Samruk-Kazyna Invest, Kazakhstan Investment Development Fund және Kazakh Invest сияқты квазимемлекеттік құрылымдардың басшылығы кірді.

Дат тарапынан Орталық Азия елдері бойынша арнайы өкіл Ларс Туесен, сондай-ақ Carlsberg Group, ALPI Danmark, Blue Water Shipping, Topsoe, Welltec, Caspian Advisory, Citibank, ByteAll және басқа да жетекші дат компанияларының басшылары қатысты. DI Жаһандық нарықтарды дамыту жөніндегі директоры Йенс Хольст-Нильсен модератор қызметін атқарды.

"Қазақстан ұзақ мерзімді серіктестік орнатуға бағытталған, оның аясында дат технологиялары, капиталы және құзыреттері қазақ нарығының ауқымымен, ресурстық базасымен және елдің өңірлік әлеуетімен табиғи түрде ұштасады. Біз дат компанияларын Қазақстанды инвестиция салу және бизнесті кеңейту үшін стратегиялық бағыт ретінде қарастыруға шақырамыз", – деп атап өтті Ә. Қуантыров.

Министрдің орынбасары Қазақстанда жүргізіліп жатқан мемлекеттік басқарудың ашықтығын арттыруға, институционалдық базаны нығайтуға және инвестициялық ахуалды одан әрі жақсартуға бағытталған саяси және экономикалық реформалар туралы да ақпарат берді.

Талқылау барысында қатысушылар дат бизнесінің Қазақстанға және жалпы Орталық Азия өңіріне деген қызығушылығының артып келе жатқанын атап өтті. Даттың бірқатар жетекші компаниялары көптеген жылдар бойы Қазақстанда табысты жұмыс істеп, жаңа инвесторлар үшін үлгі болатын сенімді табыс тарихын қалыптастырып келе жатқаны ерекше аталды.

Іс-шара аясында Қазақстан шетелдік серіктестердің қатысуына ашық нақты инвестициялық жобалар мен бастамаларды ұсынды.

Сапар аясында Ә. Қуантыров жетекші дат компаниялары мен институттарының басшыларымен бірқатар екіжақты кездесулер өткізді.

Данияның экспорттық-инвестициялық қорының (EIFO) басшылығымен өткен кездесуде тараптар Қазақстанда Қордың қаржы құралдарын қолдану мүмкіндіктерін кеңейту перспективаларын, сондай-ақ инвестициялық жобаларды қолдау мақсатында "Бәйтерек" ҰБХ" АҚ-мен ынтымақтастықты тереңдету жолдарын қарастырды.

"Carlsberg Group" компаниясының бас директоры Якоб Ааруп-Андерсенмен өткен кездесуде Алматы облысында алкогольсіз сусындар өндіретін жаңа зауыт салу жобасын қоса алғанда, компанияның Қазақстандағы өндірістік қуаттарын дамыту жоспарлары талқыланды. Инвестиция көлемі 344 млн АҚШ долларын құрайды.

Қазақ-дат іскерлік дөңгелек үстелі Қазақстанның инвестициялық әлеуетін ілгерілетуге, екі елдің бизнес өкілдері арасында тікелей іскерлік байланыстар орнатуға және екіжақты сауда-экономикалық ынтымақтастықты одан әрі тереңдетуге бағытталған маңызды алаңға айналды.