Ішкі істер министрінің орынбасары Санжар Әділов Алматыдағы әл-Фараби даңғылында болған Zeekr автокөлігі қатысқан қайғылы жол апатына қатысты тергеудің қашан аяқталатынын мәлімдеді, деп хабарлайды Egemen.kz.
Оның айтуынша, Алматы қаласында болған қайғылы жол-көлік оқиғасына қатысты тергеу ісі соңғы кезеңге жеткен. Қажетті сараптамалардың барлығы дерлік аяқталып, негізгі дәлелдемелік база жиналған.
Ведомство дерегіне сәйкес, іс бойынша тергеу алдағы екі апта ішінде аяқталуы мүмкін.
Айта кетейік, оқиға 21 наурыз күні әл-Фараби даңғылы бойында болған. Жол-көлік оқиғасы кезінде қарсы бағытқа шыққан Zeekr көлігі Mercedes автокөлігімен соқтығысқан. Апат салдарынан көліктегі үш адам оқиға орнында қаза тапқан.
Қазіргі уақытта Zeekr жүргізушісі тергеу изоляторында. Бұған дейін ол медициналық мекемеде күзетпен болғаны хабарланған.
Заң бойынша, бұл іс бойынша кінәлі деп танылған жағдайда 8 жылға дейін бас бостандығынан айыру жазасы қарастырылуы мүмкін.
Айта кетейік, Ішкі істер министрі Ержан Сәденов Әл-Фараби даңғылында болған жол апатына байланысты жасаған мәлімдемесінде бірнеше полиция басшысының қызметінен босатылғанын мәлімдеген болатын.
