Фельдшер қыздың қазасына кімдер кінәлі? ІІМ тергеу барысы туралы айтты
17.12.2025
Төтенше жағдай кезінде мерт болған фельдшер Ұлдана Мырзуанның қазасына қатысты екі бірдей қылмыстық іс қозғалды, деп хабарлайды Egemen.kz.
Мәжіліс кулуарында сөйлеген Санжар Әділовтің айтуынша, қазіргі уақытта «сапасыз құрылыс» және «өмірге қауіп төндіретін қызмет көрсету» баптары бойынша іс қозғалған.
«Қазіргі уақытта Әділет министрлігінің мамандары бірнеше сот сараптамасын жүргізіп жатыр. Сонымен қатар, Астана әкімдігі мен бейінді министрлік бірлесіп арнайы зерттеу жүргізуде. Біз бұл тексерулердің қорытындысын жақын күндері күтіп отырмыз», деді ол.
Сонымен қатар ІІМ өкілі оқиға орнына келген құтқарушылардың әрекетіне қатысты сауалға жауап берді. Оның сөзінше, құтқарушылар бекітілген нормативтік-құқықтық актілер мен бұйрықтарға сай әрекет еткендіктен, олардың жұмысына құқықтық баға берілмейді.
8 қарашада Астанадағы Тәуелсіздік даңғылы, 24B мекенжайындағы тоғыз қабатты ғимараттың қасбетінен кірпіш жабыны құлады. Салдарынан бес адам жарақат алып, №1 жалпы ауруханаға жеткізілген. 18 қарашада жарақат алған фельдшер Ұлдана Мырзуан көз жұмды. Сол күні, 18 қарашада, Қасым-Жомарт Тоқаев Ұлдана Мырзуанды «Ерлігі үшін» медалімен наградтады.
Бұл іс министрліктің тікелей бақылауында.
