Алматыдағы «Анаға құрмет» музейінде театр сахнасының саңлақтары – әйгілі актрисалардың өмірі мен шығармашылығына арналған «Ұлт театрының аналары» атты көрме ашылды, деп хабарлайды 24kz.

Театрдың музей қорынан әкелінген құнды мұралар саф өнердің 100 жылдық тарихынан сыр шертеді.

Гүлжан Көленқызы, тілші:

- Бұл көрмені қалыптасқан тіркеспен бірегей деп сипаттай салуға келмес. Себебі, мұндағы жәдігерлер жай зат емес, өмірін өнерге арнаған аяулы аналардың шығармашылығына куә болған құнды дүниелер. Келушілерге театрдың алтын дәуірінде еңбек еткен актрисалардың түпнұсқа фотосуреттері, қолжазбалары, афишалары мен портреттері ұсынылды.

Наргиз Тамабекқызы, М.Әуезов атындағы Қазақ ұлттық драма театры, музей қорының жетекшісі:

- Майлы бояулы портреттер қылқалам шеберлерінің қолынан шыққан. Бұл жерде Гүлфайруз Исмаилованың жұмысы, Ольга Кужаленконың жұмысы, Сахи Романовтардың жұмысы көрсетілген. Суреттер жағынан КСРО халық әртісі Сәбира Майқанова бастап тұр. 30-шы Сәбира Майқанова театрға келіп, қандай керемет образдар жасап, аналардың галереясын жасаған актриса.

Театрдың музей қорында 200 мыңнан астам жәдігер жинақталған. Олардың алды өткен ғасырдың 30-шы жылдарынан сақталған. Алғашқы уақытта арнайы цех болмағандықтан, сахналық киімдерді театр жанашырлары, көрермендер сыйға тартқан екен. Уақыт өте келе сахналық бейнелер үшін костюмдер арнайы тігілген.

Гүлжан Көленқызы, тілші:

- Театр музейінің әр жәдігері өзінше құнды. Ең бастысы, мұнда атақты актрисалар киіп, тері сіңген сахналық киімдері қойылған. Мына кимешекті Қазақстанның Еңбек сіңірген артисі Хабиба Елебекова өз қолымен кестелеп тіккен екен. «Абай-Әйгерім» спектакліндегі Әйгерім бейнесі үшін арнайы дайындалған. Кейін бұл костюмді Қазақстанның еңбек сіңірген әртисі Торғын Тасыбекова киіп, көрермен көңілінде Әйгерім образында жатталып қалды.

Театр тарихына арналған көрменің ашылуында актриса Шәмшәгүл Меңдиярова: «Апаларымды көріп, көңілім босады, — дейді. Киелі сахнада бірге өнер көрсеткен аяулы жандар туралы естеліктерімен бөлісті.

Шәмшагүл Меңдиярова, Қазақстанның Еңбек сіңірген артисі:

- Біз театрға келгенде Сабира апам, Хабиба апам, Бикен апам, Хадиша апам Фарида апай бәрінің дүрілдеп тұрған кезі болатын. Біз солардың әрқайсысынан театрда қалай ойнау керек, сөзді қалай айту керек. Соның бәрін үйрендік. Олардың әрқайсысының өмірлері бір трагедия, олар – репрессиядан кейінгі, аштықтан кейінгі ұрпақ. Солардың әрқайсысының өмірден көрген азабы сұмдық болды. Әрқайсысына бір-бір кино, роман жазуға болады.

Театр – құдіретті өнер. Көрме аясында танымал актёрлар «Ана – Жер Ана», «Абай» қойылымдарынан үзінді ойнады.

Авторлары: Гүлжан Көленқызы, Сержан Жұмабаев