Алания қазақтары енді қазақша сөйлейді. Түркияның туристік шаһарында ұлттық құндылығымызды дәріптейтін қазақ мәдени орталығының тұсауы кесілді. Бастама аясында мамандар қазақ тілін үйретіп, дәстүрлі би сабақтарын өткізеді. Мұнан бөлек тұрғындарды интеллектуалды тоғызқұмалақ ойынына баулиды.

3 мыңдай ғана қазақ қоныстанған қалада қазақ тілі мен өнерін дамыту орталығы тұрғындарға алғаш рет есігін айқара ашты. Енді мұнда мектеп жасындағы баладан бастап 35 жасқа дейінгі жастар тәлім алып, қазақы ортада қалыптасу мүмкіндігіне ие болады.

Әмір Мұсабек, Алания қаласының тұрғыны:

- Өте маңызды. Өйткені ұлттың болашағы – біз. Қазақтарға ол жақсы. Өйткені сен Түркияда қазақшаны үйрене аласың.

Бас консулдың айтуынша, бастама өзге елде білім алып жүрген қазақ балалары үшін ана тілін ұмытпай, мәдениет пен руханияттан ажырамауына зор септігін тигізеді.

Қуат Канафеев, Қазақстанның Анталиядағы Бас консулы:

- Шетелде ана тілін сақтау және оны жас ұрпаққа жеткізу өте маңызды. Бұл бастама болашақ ұрпақ үшін өз тілін, дәстүрі мен тарихын ұмытпай, құндылықтарды бойына сіңіріп өсіруге көмектеседі. Сондай-ақ қазақ және түрік халықтары арасындағы мәдени байланысты нығайтуда үлкен маңызға ие.

Орталық ақысыз қызмет көрсетеді. Қазақ тілін меңгеру курсына деңгейіне қарай бірнеше топ қатысады. Ал тоғызқұмалақ үйірмесі аптасына екі рет өтеді. Ұйымдастырушылар алдағы уақытта қазақтың ұлттық аспабында ойнауды үйрететін шағын күй мектебін ашуды да жоспарлап отыр.

Фериза Әбдімұратова, Алания қазақ тілі және мәдениет орталығының басшысы:

- Шетелдегі біздің қазақ жастарымыз қазақ тілін, қазақтың мәдениетін, қазақтың тарихын тереңінен білсе деген ой болды. Алания қазақтары ұйымшылмыз. Әр мейрамда кездесіп, қазақша сөйлейміз. Қазақша салт-дәстүр ұстаймыз. Қызығушылық бар.

Ұлттық би студиясы Аланияда бір жылдан бері жұмыс істеп келеді. Осы уақытқа дейін оның барлық шығынын ұжым жетекшісі өзі көтерген. Енді студия мәдениет орталығының құрамына еніп, би сабақтары тұрғындарға тегін ұсынылады.

Меруерт Қуанышқызы, би ұжымының жетекшісі:

- Ең бірінші біздің қандастарға, бауырларға үлкен алғысымызды айтамыз. Өйткені олардың қолдауы болмаса, осы орталық ашылмас па еді деп ойлаймын.

Мәдениет орталық – аймақтағы қазақ диаспорасының өміріне тың серпін берген әлеуметтік маңызы зор жоба. Әсіресе өскелең ұрпақтың тіл мен дәстүрден ажырамай, ұлттық рухты сезініп өсуіне жол ашады.

Авторлары: Әсия Нұрлыбаева, Ж. Сүйіндіков