29 мамыр – Біріккен Ұлттар Ұйымының халықаралық бітімгерлер күні. Бұл – әлемдегі қақтығыстарды тоқтатуға және бейбітшілікті нығайтуға аянбай еңбек еткен жандарға құрмет көрсетілетін ерекше күн. Қазақстан өз бітімгерлік жолын 2003 жылы бастаған сәттен бері БҰҰ миссияларына белсенді қатысып келеді. Бүгінде еліміздің әскери қызметшілері әлемнің түрлі өңірлерінде – Ливаннан бастап, Орталық Африкаға дейін бейбіт өмір орнатуға күш салып жүр, деп жазады Egemen.kz.

Қазақстанның халықаралық бітімгерлік миссияларға қатысуы 2003 жылы алғашқы инженерлік-саперлік «Қазбат» жасағының құрылуымен басталды. Бұл елдің бейбітшілік пен қауіпсіздік жолындағы алғашқы нақты қадамы болды.

2014 жылы Қазақстан алғаш рет өз әскери қызметшісін БҰҰ-ның Батыс Сахарадағы миссиясына әскери бақылаушы ретінде жіберіп, халықаралық ұйыммен ресми ынтымақтастықты бастады.

Содан бері қазақстандық бітімгерлер Ливан, Батыс Сахара, Кот-д’Ивуар сияқты түрлі аймақтарда бейбітшілік орнатуға атсалысып келеді. 2024 жылы Қазақстан БҰҰ-ның Африка мен Таяу Шығыстағы миссияларына қосымша әскери мамандар жіберді. Әсіресе Орталық Африка Республикасы, Мали және Конго Демократиялық Республикасындағы жағдайлар күрделілігімен ерекшеленді.

Қазақстан – ТМД елдерінің ішінде БҰҰ-ның Голан жоталарындағы миссиясына жеке мандатпен қатысуға рұқсат алған жалғыз мемлекет. Қазіргі таңда еліміздің 139 әскери қызметшісі атысты тоқтату режимін сақтау секілді маңызды тапсырмаларды орындауда.

БҰҰ контингентін өз бетінше орналастыру шешімі нормативтік-құқықтық базаны жетілдіру мен әскери даярлық жүйесін дамытуға бағытталған ауқымды жұмыстың жемісі болды. Осы процесте Алматы қаласында құрылған Бітімгерлік операциялар орталығы маңызды рөл атқарып отыр. Ол бітімгерлерді құқықтық, тілдік, гуманитарлық және психологиялық тұрғыдан жан-жақты дайындаумен айналысады.

Қазақстанның бітімгерлік миссияларға қатысуы халықаралық қауіпсіздікке үлес қосумен қатар, еліміздің жаһандық беделін арттырып, әскери қызметшілердің кәсіби машықтарын жетілдіруге мүмкіндік береді. Олар көпұлтты ортада әрекет ету тәжірибесін жинақтап, жауынгерлік дағдыларын шыңдай түседі.