Қазақтың: «Әп-әдемі ән еді, пұшық шіркін қор қылды», — деген сөзін артында ырыңы мен жырыңы қалған ЭКСПО ісіне қарата айтса болатындай...

Кезінде ескі биліктің шашбауын көтерген БАҚ: «Биылғы жыл ел жылнамасында айрықша әріптермен жазылатын айтулы оқиғаларға толы болды десек, олардың көш басында төрткүл дүниенің назарын Қазақ еліне бұрған айтулы оқиға – ЭКСПО-2017 халықаралық көрмесі тұрғаны талассыз. Үш айға созылған жаһандық шара мемлекетімізді әлемдік қауымдастыққа жаңа қырынан танытып қана қоймай, еліміздің әлеуметтік-экономикалық өрістеуіне, мәдени дамуына тың серпін берді. Көрме аяқталған соң көптің көкейінде «ЭКСПО елімізге не берді?» деген сауал туындады. Бұл сұрақтың қойылары әу баста-ақ белгілі еді», — деп даңғазалады.

Арада 8 жыл өткенде осы сауал қайта талқыға түсіп отыр. Атап айтқанда: Мәжіліс депутаты Ермұрат Бапи осы көктемде Парламент Мәжілісінің пленарлық отырысында «ЭКСПО ісіне» қатысты депутаттық сауал жолдаған еді. Осылайша, ЭКСПО-ның ақшасын анығында кім талан-таражға салғанына қатысты сең қозғалды.

Мәжіліс депутаты Ермұрат Бапи бұл мәселені депутаттық сауалдарында бірнеше рет көтергенімен, «Есполовтың ұрлықтағы рөлін тексеру» туралы талаптар әр жолы үнсіздікке тап болған.

Арада аз уақыт өткенде, қолға алған ісінің оңға басқанын айтып, сүйіншілеген Мәжіліс депутаты: «Ендігі түйсік қандай? Егер ЭКСПО-ның қаржысын апта сайын бірнеше «қытайский сөмкемен» қымқырған (куәгерлердің сөзі) Әсел Құрманбаеваның ағасы Айдос Есполовқа қатысты қылмыстық іс қозғалғаны рас болса, «Жаңа Қазақстан» жаңа сатыға көтерілді деген сөз. Ақсарбас! Іске сәт!», -деп жазды.

«Астана ЭКСПО-2017» компаниясының бұрынғы кеңесшісі Айдос Есполов екі күн бұрын Астанада ҰҚК жанындағы «антикормен» ұсталды», — деп хабарлады ҚазТАГ редакциясы.

Сонымен, «құрықталған Есполов кім?» дегенге жауап іздейтін болсақ, ол — экс-президент Нұрсұлтан Назарбаевтың әйелі деп айтылатын Әсел Құрманбаеваның ағасы. Назарбаевтар әулетімен туыстық мұнымен шектелмейді. Оның інісі Болат Назарбаевтың қызы Гүлмираға үйленген деген ақпарат бар.

«Айдос Есполов «Астана ЭКСПО-2017» көрмесінде пара алу және 2,2 млрд теңге жымқыру ісі бойынша күдікті ретінде өтуде», - деп нақтылайды дереккөз.

Солай болса да, Айдос Есполовтың ұсталуы қоғамда бірқатар шырғалаңы бар сауалдар тудырады. Мысалы, адвокат Мұрат Адам «Ulysmedia-ға» берген эксклюзивті түсініктемесінде: «Шынымды айтсам, бұл жайттан ескі клан өкілдері мен жаңа клан өкілдерінің арасындағы көзге көрінбейтін тартыс байқалады. Арада жыл өтті ғой, енді ғана есімізге түсті», — дейді. Оның нұсқасы Ерғалиеваның: «Бәлкім, ЭКСПО қаражаты кіші Есполовтарға берілмеген шығар. Ол ақшаны бюджеттен Назарбаевтың әмиянына әкеліп құятын «курьер» болды», — дегенді меңзейді.