Астанаға ресми сапармен Руанда Республикасының Президенті келді. Ақорда резиденциясында Қасым-Жомарт Тоқаев Поль Кагамені сән-салтанатпен қарсы алды.

Мемлекет басшылары әуелі бір біріне ресми делегация мүшелерін таныстырды. Құрмет қарауылының бастығы рапорт берген соң екі елдің әнұрандары шырқалды. Осыдан кейін лидерлер шағын құрамда, екеуара келіссөз жүргізді. Қасым-Жомарт Тоқаев бұл сапардың тарихи мәні зор деп бағалады. Сондай-ақ Қазақстан мен Руанда арасындағы қарым-қатынас жаңа деңгейге шығатынын жеткізді. Руанда Президенті Мемлекет басшысына қонақжайлық көрсеткені үшін алғыс айтып, екіжақты ынтымақты дамытуға ниетті екенін айтты. Тараптар саяси, сауда-экономикалық, көлік-логистика, ауыл шаруашылығы және цифрландыру салаларындағы қарым-қатынасты дамыту жайын талқылады.

Қасым-Жомарт Тоқаев, Қазақстан Республикасының Президенті:

Сіздің бұл сапарыңыз және алдағы келіссөздер екіжақты ықпалдастыққа тың серпін беру тұрғысынан өте маңызды деп ойлаймын. Руанданың экономикасы қарқынды дамып келеді. Меніңше, өзара байланыстарды нығайта беру қажет. Өйткені Қазақстан – ІЖӨ көлемі, ІТ технологиялар мен жасанды интеллектті дамыту бойынша өңірдегі көшбасшы ел.

Поль Кагаме, Руанда Республикасының Президенті:

Еліңізге шақырғаныңыз үшін ризашылығымды білдіремін. Мен бұған дейін Қазақстанға 2015 жылы келген болатынмын, бұл менің екінші сапарым. Өзіңізбен және Сіздің командаңызбен бірге екі ел игілігі жолындағы бірлескен жұмысымызды жалғастырудың мүмкіндіктерін қарастырамыз.

Шерхан Жамбылұлы