Қонаев қалалық кітапханасында Алматы облыстық әкімдігінің қолдауымен шыққан жаңа комикстердің таныстырылымы өтті. Халқымыздың бай рухани мұрасы мен дәстүрлі құндылықтарымызды жас ұрпаққа заманауи форматта жеткізуге арналған жобаны өңірлік дін істері басқармасы жүзеге асырды. Танымдық комиксер сериясы мектеп жасындағы балалар мен жасөспірімдерге арналған.

Алматы облыстық дін істері басқармасы шығарған танымдық комикстер 10 бөлімнен тұрады. Ол қазіргі заман баласы мен атасының арасындағы әсерлі диалогқа құрылған. Жобаны жүзеге асырушылардың мақсаты – екі буынның арасындағы салиқалы сұхбат арқылы дәстүр мен діннің, өткен мен бүгіннің арасына алтын көпір орнату.

Мереке Құлкенов, Қазақстан жазушылар одағының басқарма төрағасы:

- Комикс деген ол жай мәтін емес қой жазып қоятын. Онда бала көзімен көріп, жүрегімен сезінетін суреттер болады. Сол суреттерді мәтіндер жетелеп отырады. Сондықтан баланың жүрегіне, баланың түсінуіне, баланың қабылдауына өте ыңғайлы нәрсе.

Танымдық комикстер «Абай әлемі», «Сенің батырларың кімдер?», Ата-бабаң кім?», «Ұлт ұстазы», «Батыр – суперқаһарман», «Төрт түліктің патшасы», «Өз халқының перзенті», «Қара жамылған әйел», «Пайдасыз білім», «Қазақтың жаны» сияқты бөлімдерден тұрады. Мәселен, «Ата-бабаң кім?» комиксы арқылы балалардың жеті атасын білуге деген құмарлығы артады», – дейді аталған жобаны жүзеге асырушылар.

Бекжан Тұрыс, Қазақстанның еңбек сіңірген қайраткері:

- Тек қана ата мен баланың аясында қалмауы керек. Ата, бала, немере – бұл үшеуі ошақтың үш бұтағындай ұғым. Біреуі құласа қазан төңкеріледі. Жалпы бастама жаман емес, жақсы.

Жиынға қатысқан зиялы қауым өкілдері мен қонақтар тарапынан айтылған ұсыныстар ескеріледі. Сондай-ақ комикстердің бейнежазбасы колледждер мен мектептерде және арнайы тақырыптық айдармен ютуб-видеохостингінде кеңінен таратылады.

Авторлары: Ардақ Айбарұлы, Аят Дүйсенбаев, Аманжол Жөңкешов