Әлеуметтік желіде Алматыдағы 90 жылдық тарихы бар ипподромның орнына тұрғын үй кешені салынғалы жатқаны туралы ақпарат тарады, — деп хабарлайды Massaget.kz тілшісі.

Алматы әкімдігінің баспасөз қызметі Massaget.kz-ке осы жайтқа қатысты пікір білдірді.

"Тарихи ипподром аумағында ешқандай құрылыс жұмыстары жүргізіліп жатқан жоқ, сондай-ақ, тұрғын үй немесе коммерциялық нысандар салу жоспары да жоқ. Ипподром бұрынғыдай жұмыс істеп тұр, онда ат спорты жарыстары өткізіліп, ұлттық спорт түрлерін дамыту ісі жалғасып келеді", — деді "Тенгри Инвест" ЖШС директоры Ержан Майлыбаев.

Алматы әкімдігі де бұл ақпарат негізсіз екенін растап отыр.

"Егжей-тегжейлі жоспарлау жобасына сәйкес бұл аумақ ипподром ретінде бекітілген, оны бұзу жөнінде ешқандай рұқсат берілген жоқ", — деді әкімдік өкілі.

Бұған дейінгі жағдай

Еске салайық, бұған дейін де Алматы қаласындағы тоқсан жылдық тарихы бар ипподромның тағдыры қыл үстінде тұрғаны хабарланды.

Артынша Алматының бұрынғы әкімі Ерболат Досаев ипподромның бағыты өзгеріссіз қалатынын мәлімдеді.

Аптаның басты оқиғалары мен пайдалы видеоларды көру үшін YouTube арнамызға жазылыңыз