Белгілі америкалық жаттықтырушы Андре Розье қазақстандық кәсіпқой боксшы, орта салмақтағы WBO және IBF тұжырымдары бойынша әлем чемпионы Жәнібек Әлімханұлының шеберлігін жоғары бағалап, оның рингтегі басты мәселесін атап өтті, деп хабарлайды Skifnews.kz ақпарат порталы 1bol.kz-ке сілтеме жасап.

«Жәнібек – мықты боксшы, шын мәнінде өте берік жігіт. Маған оның стилі ұнайды: ол үлкен, күшті, әрі дәл соққы жасайды. Алайда ол тым сирек жұдырықтасады. Егер жиірек рингке шықса, оның есімі әлдеқайда жиі аталар еді. Менің ойымша, ол келешекте екінші орта салмаққа да көтеріле алады», — деді Андре Розье YSM Sports Media-ға берген сұхбатында.

Жәнібек Әлімханұлының келесі жекпе-жегі 6 желтоқсанда АҚШ-тағы Сан-Антонио қаласында өтеді. Бұл кездесуде қазақстандық боксшы WBA тұжырымының чемпионы, кубалық Эрисланди Ларамен титулдарды біріктіру жекпе-жегінде күш сынасады.

Айта кетейік, «Қазақ стилі» лақап атымен танымал Әлімханұлы соңғы кездесуін биыл сәуір айында Астанада өткізіп, француз Анауэль Нгамиссенгемен кездесуде бесінші раундта нокаутпен жеңіске жеткен болатын.