Бас прокуратураға жасанды интеллект элементтері енгізілді. Қылмыстық қауіп-қатер тәуекелдерін болжау орталығы әлемдегі медиа-кеңістікті талдауға көшті. Бұл технология жаһандағы қандай да бір қылмыстың түрін анықтап, елімізге келуі ықтимал қатерлер туралы ақпарат береді.

Мамандар мұндай жаңашылдықтың әсіресе, интернет-алаяқтықпен күресте нәтиже беріп жатқанын айтады. Яғни былтыр мұндай 14 мыңнан астам дерек тіркелсе, биыл 17 мыңдай интернет-алаяқтық анықталған.

Мәди Тугубаев, ҚР Бас прокуратурасы комитеті қылмыстық қауіп-қатер тәуекелдерін болжау орталығының прокуроры:

- Әлемдік медиакеңістікті талдау орталығы жасанды интеллектіні қолдана отырып, әлемдік барлық қылмыс түрін талдайды. Соның ішінде Қазақстанға келуі мүмкін қылмыстардың түрін анықтап, бізге ЖИ ұсыныстар береді, әлемдік тәжірибені көрсетеді. Осының негізінде біз жаңа қылмыстарды анықтап, мемлекеттік органдарға және басқа да ұйымдарға ұсыныстар береміз.