Текелі қаласының әкімдігі жол жөндеу жұмыстарының барысы туралы ресми түрде хабарлайды. 14 қазан күні қалалық әкімдіктің ресми парақшасында Қонаев көшесінің қалаға кіреберіс бөлігінде 15–18 қазан аралығында жөндеу жұмыстары жүргізілетіні жөнінде хабарлама жарияланған болатын, деп хабарлайды Skifnews.kz ақпарат порталы.
Осыған байланысты аталған кезеңде көлік қозғалысы уақытша шектелді. Азаматтарға ыңғайлы болу мақсатында бұл ақпарат жергілікті блогерлер мен БАҚ өкілдеріне де жолданды. Хабарламада жөндеу уақыты кезінде қалаға кірудің балама бағыты — Қаратал ауылы арқылы жүзеге асатыны нақты көрсетілген. Жалпы ұзындығы 6 шақырымды құрайтын жол учаскесінде жұмыстар кестеге сай атқарылып, бүгінгі таңда 71,6 пайызы толық орындалды. 18 қазан күні негізгі жол бөлігі пайдалануға беріліп, көлік қозғалысы қалпына келтірілді. Қазіргі уақытта қалаға кіреберіс бағыттағы қатынас қалыпты режимде жүзеге асып жатыр. Жоба екі жылға есептелген және 2026 жылдың мамыр айының соңына дейін толық аяқтау жоспарланған. Бұл жұмыстардың басты мақсаты — жол сапасын арттырып, тұрғындар мен қонақтардың қауіпсіз әрі ыңғайлы қозғалысын қамтамасыз ету. Текелі қаласы әкімдігі тұрғындардың уақытша қолайсыздыққа түсіністікпен қарағандары үшін алғысын білдіреді және қаланың инфрақұрылымын жақсарту бағытындағы жұмыстар жалғасатынын атап өтеді.
