« Теңізшевройл » серіктестігі қазақстандық қамту үлесін 71 пайызға дейін жеткізді.
Бұл компанияның отандық жеткізушілермен әріптестікті кеңейту бағытындағы тарихи көрсеткіші. «Теңізшевройл» елдегі ең ірі жергілікті тауар сатып алушы кәсіпорын саналады. Биылдың сегіз айында компания отандық өнімдер мен қызметтерді сатып алуға 270 миллионнан астам доллар жұмсаған.
Ақтаудағы биылғы Мұнай-газ машина жасау форумы дәстүрлі түрде «Теңізшевройл» компаниясының қолдауымен өтті. Шара жергілікті өндірушілердің әлеуетін көрсетіп, олардың ірі жобаларға қатысу мүмкіндігін кеңейтуді көздейді. Форум аясында отандық тауар өндірушілер өз өнімдерін ұсынған ауқымды көрме өтті.
Әлия Жұманова, "Corrocoat Caspian" ЖШС Бас директоры:
- Біз «Теңізшевройлдың» талаптарына сай құзыретті жеткізуші ретінде сертификат алдық. Компания біздің техникалық мүмкіндігімізді арттыруға үнемі қолдау көрсетіп келеді. Соның нәтижесінде мұнай-газ саласына арналған коррозияға төзімді жаңа материал түрлерін өндіруді жолға қойдық. Қазір зауыт жылына 1 миллион литрге дейін химиялық өнім шығарады.
Былтырғы форум нәтижесінде «Теңізшевройл» тоғыз отандық өндірушімен меморандумға қол қойған еді. Олардың төртеуі техникалық біліктіліктен сәтті өтіп, жарылысқа төзімді құрал-жабдықтар, фланецтер, фитингтер, сорғылар мен басқару шкафтарына ресми түрде тапсырыс алды. Қалған компаниялар да «Теңізшевройлдың» мақұлданған жеткізушілер тізіміне ену үшін техникалық сәйкестік рәсімдерінен өтіп жатыр.
Көңілқош Сүйесінов, "Теңізшевройл" Бас директорының орынбасары:
– Биылғы форум нәтижесінде жергілікті өндірушілермен жалпы құны 150 миллион доллар болатын сегіз келісімшартқа қол қойылды. Сонымен қатар төрт компаниямен ынтымақтастық туралы меморандум жасалды. Бұл құжаттар аясында олар біздің жобаларымызға қажетті жабдықтар жеткізеді.
«Теңізшевройл» 1993 жылдан бері Қазақстан экономикасының дамуына елеулі үлес қосып келеді. Компания осы уақыт ішінде мемлекеттік бюджетке 206 миллиардтан астам доллар аударған. Бұған қоса, қазақстандық тауарлар мен қызметтерді сатып алуға 51,4 миллиард доллар жұмсады. Тек былтырдың өзінде 16 отандық өндіруші техникалық біліктіліктен өтті. Ал 2025 жылдың басынан бері қазақстандық қамтуды дамытуға 1 миллиард доллар инвестиция бөлінді.
Талғат Исламұлы, Ренат Досалиев, Саламат Бекбаев
