Бейнеу ауданының Сам ауылында «Жайлы мектеп» ұлттық жобасы аясында 300 орындық мектеп-бөбекжай кешенінің құрылысы басталды, деп хабарлайды Egemen.kz Маңғыстау облысының баспасөз қызметіне сілтеме жасап .

2022 жылдың сәуірінде апатты деп танылған Сам ауылындағы «Сам» мектеп-бөбекжай кешенінің орнына жаңа білім ошағы бой көтереді. Құрылыс жұмыстарын «СКА-Строймонтаж» ЖШС жүргізіп жатыр.

Қазіргі таңда нысанда ішкі және сыртқы әрлеу жұмыстары қарқынды жүруде. Ішкі әрлеу 97 пайызға аяқталған. Сонымен қатар аулаға асфальт төсеу, кеспе тас (брусчатка) салу, кәріз жүйесін орнату және электр желілерін тарту жұмыстары жалғасып жатыр. Құрылыс тамыз айында толық аяқталып, қыркүйек айында пайдалануға беріледі.

Бұдан бөлек, облыс бойынша «Жайлы мектеп» ұлттық жобасы аясында жалпы 8100 орынға арналған 9 мектептің құрылысы қарқын алған. Бұл нысандар да жаңа оқу жылында оқушыларға есігін ашпақ.