Ұлыбритания үкіметі мектептердегі тәртіпсіздікті жойып, сабаққа қатыспайтындармен күресті күшейтуді жоспарлап отыр. Білім министрі бала тәрбиесіне тікелей ата-ана жауапты деп кесіп айтты.
Ғалымжан Қараманұлы, тілші:
- Министрдің мәлімдеуінше, жекелеген оқушылардың тәртіпсіздігі басқа балалардың білім алуына кедергі келтіріп жүр. Жаңа деректерге сәйкес, әр сабақтың жарты сағаты төбелес пен жаға жыртысуға жұмсалады. Және мінезі шатақ оқушылардың саны артып келеді. Оларды мектептен шығарып жіберу фактілері де рекордтық деңгейге жеткен.
КСМ: Тәртібі нашар оқушылар негізінен жұмысшы британ отбасыларының балалары. Дәл осы демографиялық топ сабақтан жиі қалып, оқудан шеттетіледі. Алдағы уақытта министрлік бес мың мектепке қолдау көрсетпек. Бағдарлама аясында тегін үйірмелер ашылып, оқушылардың психикалық денсаулығына ерекше мән беріледі. Сондай-ақ сыныптарды жөндеуге бір жарым миллиард фунтқа жуық қаржы бөлінбек.
Бриджит Филлипсон, Ұлыбритания Білім министрі:
- Оқу орындарының көпшілігі жартылай жұмыс істеп, талапқа сай емес білім беріп келеді. 600-ден астам мектеп Білім сапасы стандарттарын бақылау басқармасынан «қанағаттанарлықсыз» деген баға алған. Онда 300 мыңнан астам бала оқиды. Сапасыз мектептердің оқушылары төмен нәтиже көрсетеді.
Білім саясаты институтының зерттеуінше, әдетте тұрмысы төмен отбасылардан шыққан балалар себепсіз сабақтан қалып, көптеген қатарласынан үлгерімі бойынша артта келеді. Мектеп директорларының айтуынша, бұған кедейшілік және отбасындағы проблемалар себеп.
Натали Перейра, Білім саясаты институтының атқарушы директоры:
- Әлеуметтік көмектің қысқаруы ең алдымен кедей отбасыларға ауыр соққы болғанын көріп отырмыз. Сондай-ақ ғаламдық пандемия экономикамыз бен білім беру
жүйесіне теріс әсер етіп, бай мен кедей арасындағы алшақтық анық байқалды және бұл үрдіс жалғасып келеді. 10 жылғы ілгерілеуіміз зая кетті.
Білім министрі жаңа оқу жылында бала тәрбиесіне мұғалімдерді ғана емес ата-аналарды да көбірек тартуды көздеп отыр. Топ жарып жүрген үздік оқу орындарының директорлары сапасыз мектептерді қанатының астына алады.
Ғалымжан Қараманұлы, тілші:
- Өткен жылы Англия билігі сабақтан қалған жарты миллионға жуық оқушының ата-анасына айыппұл салды. Бұл — пандемияға дейінгі кезеңнен 53%- ға артық. Жазда айыппұл көлемі 60-тан 80 фунтқа дейін көтерілді. Бұл шамамен 50 мың теңге. Бірақ сарапшылар мәселе түбірімен шешілмесе, бәрі бекер деп отыр.
Авторы: Ғалымжан Қараманұлы
