Алматы — Өскемен тасжолының 35-шақырымында, Алатау ауылы маңындағы қатты тұрмыстық қалдықтар полигонында өрт шықты. Өртсөндірушілер тілсіз жаумен екі күннен бері күресіп жатыр, — деп хабарлайды Massaget.kz тілшісі.

Мән-жайы

Алматы облысы әкімдігі мәліметінше, жалпы аумағы 35 гектар болатын полигонның шамамен 10 гектар жерінде қоқыс жанған.

"Өртті сөндіруге 108 адам және 54 техника жұмылдырылды. Мамандардың айтуынша, жағдай толық бақылауда", — деді өңір әкімдігі өкілдері.

Алматы облысы әкімдігі

ТЖМ не дейді?

ТЖМ мәліметінше, Алматы облысында қатты тұрмыстық қалдықтар полигонындағы өртті сөндіру жұмыстары жалғасып жатыр.

"Кейбір учаскелерде 10 метрге дейінгі тереңдікте бықсу байқалады. Өрт ошақтарын сөндіру үшін инертті материалдармен толтырып жатырмыз. Жел қосымша қиындық туғызып отыр. 7 өрт сөндіру учаскесі құрылды", — деді ТЖМ өкілі.

Оқиға орнында жедел штаб құрылған.

"Жағдай Төтенше жағдайлар министрлігінің бақылауында. Өрттің жақын маңдағы аумақтарға таралу қаупі жоқ", — деп жазылған хабарламада.

Instagram парақшамызға жазылып, ең қызықты ақпараттарды бірінші болып оқыңыз!