Ұлытау облысында бюджет қаражатын жымқырған бухгалтерге үкім шықты, — деп хабарлайды Massaget.kz тілшісі.

Жезқазған қалалық соты Сәтбаев қаласы білім бөліміне қарасты №2 балалар музыка мектебінің бухгалтерін 28 миллион теңгеден аса бюджет қаражатын жымқырғаны үшін кінәлі деп таныды.

Сот тергеуі барысында бухгалтер 2024 жылдан 2025 жылға дейін өзіне заңсыз түрде артық жалақы тағайындап отырғаны дәлелденген. Сондай-ақ, бухгалтер мекемеде іс жүзінде жұмыс істемеген адамдарға жалақы есептеп отырғаны анықталды.

"Сот үкімімен оған 5 жыл 4 ай мерзімге бас бостандығынан және дәл осы мерзімге бухгалтерлік қызметпен айналысу құқығынан айыру жазасы тағайындалды. Үкім заңды күшіне енген жоқ", — деп жазылған хабарламада.

Аптаның басты оқиғалары мен пайдалы видеоларды көру үшін YouTube арнамызға жазылыңыз