Атақты италиялық жазушы Карло Коллодидің аңызға айналған «Пиноккио» ертегісі қазақ тіліне аударылады, деп хабарлайды 24KZ. Кішкентай оқырмандарға арналған классикалық шығарманы тәржімалауды Алматыдағы Италия мәдениет институты қолға алмақ. Институт Италия Республикасының Қазақстандағы елшілігі жанынан құрылған. Екі ел арасындағы мәдени байланысты арттыруға арналған кітаптарды аудару бір жыл бұрын басталған.

Алматыдағы Италия мәдениет институты 2023 жылдың қазанында ашылған. Бұл мекеме бар болғаны 1,5 жылдың ішінде халықаралық диалогтың маңызды алаңына айналды. Институт итальян тілін, өнерін насихаттап, білім мен мәдениеттегі ынтымақтастықты дамытып жатыр.

Эдоардо Крисафулли, Алматыдағы Италия мәдениет институтының директоры:

- Біз небәрі 18 ай жұмыс істеп келеміз. Бірақ Spazio D атты маңызды жобаны жүзеге асырдық. Бұл дизайндағы инновацияларға арналған кеңістік. Мұнда италиялық және қазақстандық авторлардың шығармашылығы байланыс тапты. Екіжақты әріптестікке басымдық береміз. Жақын арада біз Венеция галереясына қатысқан қазақстандық суретшілердің жұмыстарына арналған көрме ұйымдастырамыз. Бұл туындылар Алматыда көрсетіледі.

Жақында ғана Италия мультфильмінің кейіпкері Джеронимо Стилтон есімді тышқанның «Италияға саяхаты» да қазақ тіліне тәжімаланды. Ал «Пиноккио» ертегісі келесі жылы оқырманға жол тартады. Сондай-ақ бұл шығарма Алматыдағы №199 мектеп-гимназиясында сахналанды. Мұнда институттың қолдауымен итальян тіліндегі балалар театры жұмыс істейді. Оқушылар Дантенің «Құдіретті комедиясынан» бастап Марко Полоның шытырманға тола саяхатына дейін қойды.

Маурицио Сбараини, Алматы қаласындағы Италия Республикасы елшілігінің өкілі:

- Бұл өнерге басымдық беретін мектеп болғандықтан, біздің жұмысымыз онша ауыр емес. Таңертең негізгі пәндер оқытылса, түстен кейін балалар өнерге қатысты сабақтарды оқиды. Мүсін, кескіндеме, мозаика жасауды үйренеді. Ал Италия осы өнер түрлерінің отаны деуге болады. Сондықтан бізде әңгімеге арқау болатын тақырыптар өте көп. Мәдениетті, тілді де жеткізудің көптеген жолы бар.

Қазақстан-Италия арасындағы дипломатиялық қатынастың орнағанына 30 жылдан асты. Мәдениет институтының миссиясы – итальян тілі мен мәдениетін насихаттау. Одан бөлек, көрмелер мен фестивальдер ұйымдастырады, музыка, би, кино, театр, әдебиет бағытындағы әртүрлі бірлескен шараларға ұйықты болды.

Эдоардо Крисафулли, Алматыдағы Италия мәдениет институтының директоры:

- Біздің институт ашылған сәттен бастап бірқатар мәдени шараны ұйымдастырдық. Солардың бірі – Астанадағы Ұлттық музейде Леонардо да Винчидің түпнұсқа туындыларының көрмесі. Мұндай іс-шараны ауқымы жағынан тек Токиода өтетін көрмелермен салыстыруға болады. Бұл Қазақстанның мәдени серіктес ретіндегі маңызын айқындайды.

Италия операның да отаны саналады. Бұл салада да жақсы байланыс орнаған. Айта кетейік, былтыр жаңа ұлттық опера «Хан Сұлтан. Алтын Орданы» сахналауға танымал италиялық режиссёр Давиде Ливермор шақырылды. Бұл әріптестік келесі жылы да жалғасып, Алматыдағы Италия мәдениет институты мен Абай атындағы Қазақ ұлттық опера және балет театры тағы бір қойылымды сахналамақшы. Ол итальяндық композитор Джакомо Пуччинидің шығармашылығына арналады.

Авторлары: Аршын Кемелжан, Сержан Жұмабаев