Биыл 11 айда Қазақстанда жедел медициналық жәрдем қызметі 7 млн-нан астам шақыртуға қызмет көрсетті. Ең көп шақырту Алматы қаласында, Түркістан облысында және Астанада тіркелді, деп хабарлайды KAZ.NUR.KZ Денсаулық сақтау министрлігінің баспасөз қызметіне сілтеме жасап.

Министрлік мәліметінше, 1 375 401 шақыртуға емханалар жанындағы мобильдік бригадалар, қалғандарына жедел медициналық жәрдем қызметі жәрдем көрсетті.

Сондай-ақ министрлік өкілдері кімдер жедел медициналық көмекке мұқтаж болғанын айтты.

Шақыртулардың ең үлкен үлесі:

• тыныс алу ағзаларының аурулары – 1 778 189;
• жүрек-қан тамырлары аурулары – 1 434 483;
• басқа аурулар – 1 249 223;
• жарақаттар, уланулар және жазатайым оқиғалар — 735 183; соның ішінде ЖКО – 40 972;
• неврологиялық аурулар – 714 915.

Жыл қорытындысы бойынша сәтті реанимация көрсеткіші 8,2 пайызға өсіп, 60,3 пайызға жеткен.

Есепті кезеңде жарақаттар бойынша 685 503 шақыртуға, оның ішінде ЖКО бойынша 40 972 шақыртуға қызмет көрсетілді. ЖКО салдарынан 52 097 адам зардап шекті, оның 64,3 пайызы стационарларға жеткізілді. Қаза тапқандардың үлесі зардап шеккендер санының 2,4 пайызын құрады. Жол-көлік оқиғасы кезінде жетудің орташа уақыты 8 минут.

Жіті миокард инфарктісі бойынша 27 378 шақыртуға қызмет көрсетілді. Тромболитикалық терапия көрсетілген жағдайлардың 89,9 пайызына жасалады.

Инсульт бойынша 52 207 шақыртуға қызмет көрсетілді. Нормативтік мерзімде инсульт орталықтарына емдеуге жатқызу қаладағы пациенттердің 97,9 пайызда және ауылдық жерлерде 88,5 пайызда қамтамасыз етілді.

Еліміз бойынша бір ауысымда 1 618 көшпелі бригада, оның ішінде 258 мамандандырылған дәрігерлік және 1 360 фельдшерлік бригада жұмыс істейді. ЖМЖ қызметінің кадрлармен қамтылуы 86,8 пайызды: дәрігерлермен – 74,8 пайыз, орта медицина қызметкерлерімен-88,1 пайыз болды.

Мәтіннен қате тапсаңыз, бізге жазыңыз