Синоптиктер Қазақстан бойынша ауа райының 2026 жылғы қаңтарға арналған консультативтік болжамын жариялады, оған сәйкес ауа температурасы нормадан жоғары болады деп күтіледі, деп хабарлайды KAZ.NUR.KZ "Қазгидрометке" сілтеме жасап.

Консультативті болжамға сәйкес, қаңтар айы жылы болады деп күтіледі. Республика аумағында айлық орташа ауа температурасы климаттық нормадан 1–2°С-қа жоғары болады.

Айлық жауын-шашын мөлшері Қазақстанның басым бөлігінде норма шамасында болады деп болжанады. Ал нормадан көп жауын-шашын Павлодар облысында, Солтүстік Қазақстан және Шығыс Қазақстан облыстарының басым бөлігінде, Қостанай облысының солтүстігінде, Ақмола, Қарағанды және Абай облыстарының солтүстік-шығысында, Алматы және Жамбыл облыстарының оңтүстік жартысында, Түркістан облысы мен Жетісу облысының оңтүстік-шығысында күтіледі.

Ай бойы қар, екпінді жел, боран, тұман және көктайғақ құбылыстары ашық, аязды ауа райымен алмасып отырады.

• Елдің батысында бірінші онкүндіктің басында түнде ауа температурасы -10…-18°С-қа дейін, күндіз -5…-12°С-қа дейін төмендейді. Кейіннен ауа температурасының әлсіз оң мәндерге дейін жоғарылауы күтіледі.
• Елдің солтүстік-батысында, солтүстігінде және орталық өңірлерінде түнгі ауа температурасы -10…-20°С-тан -3…-8°С-қа дейін, күндіз -12…-2°С-тан -5…+3°С-қа дейін ауытқиды.
• Елдің шығысында түнде ауа температурасы -2…-13°С-тан -10…-18°С-қа дейін, күндіз -6…+2°С-тан -2…-10°С-қа дейін болады.
• Елдің оңтүстік-батысында, оңтүстігінде және оңтүстік-шығысында түнде ауа температурасы -2…-12°С-тан -5…+5°С-қа дейін, күндіз -3…+8°С-тан +5…+10°С-қа дейін, ал елдің қиыр оңтүстігінде +15°С-қа дейін жоғарылауы мүмкін.

Айдың екінші және үшінші онкүндіктерінде солтүстік, солтүстік-батыс, шығыс және орталық өңірлерде суық ауа массалары еніп, түнгі ауа температурасы -25…-35°С-қа дейін, күндіз -15…-20°С-қа дейін төмендейді деп болжанады. Қаңтардың ең жылы күндерінде ауа температурасы -5…+3°С-қа дейін көтеріледі.

Елдің батысында суық толқындар кезінде түнде ауа температурасы -20…-27°С-қа дейін, күндіз -12…-19°С-қа дейін төмендейді. Айдың жекелеген күндерінде күндізгі ауа температурасының 0…+5°С-қа дейін жоғарылап, жылымықтар болуы мүмкін.

Елдің оңтүстік бөлігінде түнгі ауа температурасы 0…-5°С-тан -10…-20°С-қа дейін, күндіз +2…+12°С-тан -3…-13°С-қа дейін ауытқиды. Үшінші онкүндіктің жекелеген күндерінде түнде ауа температурасы -20…-30°С-қа дейін, күндіз -10…-18°С-қа дейін төмендеуі болжанады.

Мәтіннен қате тапсаңыз, бізге жазыңыз