Екібастұздық кәсіпкер Серік Сәдуақасов Ұлттық қауіпсіздік комитетінің Шекара қызметіне 50 жылқы берді. Бір жарым жасар жабағылар тиелген әскери жүк көліктері Жетісу облысына жол тартты.

Одан әрі Текелі қаласындағы кавалериялық бөлімшеге жеткізіледі. Шекарашылардың айтуынша, жылқыларға ерекше күтім жасалып, арнайы бағдарлама бойынша үйретіледі. Тек қызметтік талапқа сай келгеннен кейін, шекара заставаларына бөлініп беріледі. Жалпы, шекара қызметінде техника бара алмайтын таулы, орманды аймақтарды атпен аралауға тура келеді.

Жасұлан Қашқаров, ҚР ҰҚК шекара қызметі Жетісу облысы бойынша департаментінің офицері:

- Қазіргі уақытта сол жылқыларды тасымалдау жұмысы ұйымдастырылуда. Бұл жылқылар Жетісу департаменті, Панфилов шекара басқармасына қарасты, Текелі қаласында орналасқан қызметтік жылқыларды үйрету бөлімшесіне апарылады. Болашақта бұл жылқылар үйретіліп, шекара қызметінің шекара бөлімшелеріне, мемлекеттік шекараны күзетуге қолданылатын болады.