Талғар қаласында ер адамды атып өлтіріп, жас баланы ұрлап әкеткен қылмыс тіркелді, деп хабарлайды Egemen.kz.

Облыстық полиция департаментінің мәліметінше, оқиға кезінде қылмысқа күдікті мен жәбірленуші тарап (баланың анасы – ред.) бұрын жақын қарым-қатынаста болған. Кейін олардың арасында жанжал туындаған.

Тергеу болжамына сәйкес, жанжал кезінде күдікті әйелдің туған бауырына аңшы мылтығынан оқ атқан. Ер адам оқиға орнында көз жұмды. Қылмыстан соң күдікті жас баланы алып, белгісіз бағытқа қашып кеткен.

«Күдіктінің жеке басы мен жүрген жері анықталды. Оны ұстау бойынша жедел шаралар қабылданып жатыр. Сонымен қатар болған оқиғаның барлық мән-жайын анықтау үшін кешенді тергеу амалдары жүргізілуде», – деп мәлімдеді полициядан.

Қазіргі уақытта аталған фактілер бойынша кісі өлтіру және бала ұрлау деректері бойынша қылмыстық істер қозғалды.