Бауыр – адам ағзасындағы ең ірі мүшелердің бірі, бүкіл ағзаның саулығы тікелей соған байланысты. Кейбір күнделікті әдеттер, тіпті пайдалы көрінетіндері де, оның жұмысын қатты әлсіретуі мүмкін. Мысалы, "сақтық үшін" ішілетін дәрумендер мен биологиялық белсенді қоспалар (ББҚ). Бұл туралы Life.ru сайтына "СМ-Клиника" дәрігер-гастроэнтерологы Наталья Панина айтты, — деп хабарлайды Massaget.kz тілшісі.

Дәрігердің айтуынша, бауыр ағзаны уыттардан тазартады, ақуыз, гликоген мен холестерин синтездейді, ас қорытуға қажет өт шығарады және дәрумендер, темір мен глюкозаны сақтайтын қойма қызметін атқарады. Бұл мүше ерекше қалпына келу қабілетіне ие, бірақ оның да мүмкіндігі шектеулі.

Артық салмақ – бауырдың басты жауы: майдың жиналуы оның жасушаларын зақымдап, қабынуға, тіпті циррозға әкелуі мүмкін. Басқа да қауіпті факторларға дәрі-дәрмектерді, ББҚ мен дәрумендерді бақылаусыз қабылдау жатады, ол уытты гепатитке соқтыруы ықтимал.

Алкоголь де бауырға тікелей зиян келтіреді. Тіпті шамалы мөлшердің өзі бауырдың алкогольдік ауруына және циррозға шалдығу қаупін арттырады. Сондай-ақ қарапайым көмірсулардың, әсіресе тәтті сусындардағы артық фруктоза, жануар майы мен трансмайларға бай тағамдар да зиянды. Фастфуд – олардың ең көп кездесетін көзі.

Бауыр үшін балмұздақтың да зияны зор. Дәрігерлер оны тұтынбауға кеңес береді. Бірақ тәттісін қимайтындарға балама бар: құрамында сүт майының орнына өсімдік майы қолданылған балмұздақ түрлері бар. Ондай өнімдерде холестерин мен қаныққан май қышқылдарының мөлшері төменірек болады.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!