Әлеуметтік желіде заңсыз казино ойындарын жарнамалаған қазақстандық блогерлердің тізімі жарияланды, деп хабарлайды 24kz.

Тыйым салынған жарнама үшін миллиондап табыс тапқан 34 азаматтың атын Қаржы мониторинг агенттігі атады. Қайсар Қамза, Мәриям Құлжабаева, музыкант Ринат Шамшырақпен бірге тізімде тағы кімдер бар? Ауырдың үсті, жеңілдің астымен жүретіндерге қарсы жазаның күшейетіні рас па?

Шерхан Абзалұлы, тілші:

- Шетелді шарлап, тау-тасты аралап, отыз күй ойын, қырық күн той тойлап жүретін блогер – Қайсар Қамзаға тықыр таянды. Желіде 3 млн-ға жуық жазылушысы бар ол онлайн ойындарды заңсыз жарнамалаған. Бұл туралы Қаржы мониторинг агенттігі хабарлады.

Желідегі жұртқа жалған жеңімпаздардың видеосын жариялап, оңай олжаға кенелуді үйреткен тағы 33 блогер агенттіктің көзіне түсті. Олардың 11-і әкімшілік жауапкершілікке тартылды. Қалған 23-іне шара қолдану қарастырылуда.

Жастар арасында Гуджан лақап атымен белгілі Тәуіржан Айтмаханов, отбасылық контентпен айналысатын Диляра Аманқосқызы. Қаржылық мониторинг агенттігі атын атаған блогерлар арасында атышулы Наиль Тұрғанов та бар.

Заң жолынан тайып, жалғанды жалпағынан басып жүргендерге жаза жеңіл көрінеді. Мысалы мониторингтің назарына түскен – музыкант Баллер. Биылдың өзінде бір емес, бес мәрте жауапкершілікке тартылған.

Құмар ойындардың жарнамасы қалай жүзеге асады? Көзге көрінбейтін казино иелері қолшоқпар ретінде блогерлерлерді пайдаланады. Жазылушылары жетіп артылатын авторлар жеңіл жолмен ақша табудың қыр-сырын жариялайды. Сол сілтеме арқылы тіркелген әр адам үшін ақша алады. Ал құмар ойынның құдығына кімнің құлайтынында шаруасы жоқ.

Бұған дейін блогерлер жарнамадан миллиондап табыс тауып, айыппұлға тиын-тебенін ғана төлеп құтылып келді. Енді оларға қолданылатын жаза күшейеді. Бұдан былай заңсыз сторис салғандардың қолына кісен салынуы мүмкін.

Ернар Тайжан, ҚР ҚМА ресми өкілі:

- Осыған байланысты агенттік мұндай әрекеттерді ҚР ҚК-нің 28-бабының 5-тармағы аясында заңсыз ойын бизнесіне көмектесу ретінде қарастыруға ниетті. Сонымен қатар қаржы пирамидаларын жарнамалағандағыдай, онлайн-казино жарнамасы үшін де қылмыстық жауапкершілік енгізу бастамасы көтерілді.

Енді блогерлерді әкімшілік емес, қылмыстық жауапкершілікке тарту жазасын қоғам белсенділері де құптайды.

Серікболсын Сәрсенбаев, қоғам белсендісі:

Контент жасаушы адам ол өзінің контентінің сапасы мен салдарына жауап беру тиіс. Бірқатар блогерлер жарнамалауды тоқтатпай отыр. Айыппұлдың көлемі тым аз, бұны біз алдағы уақытта қылмыстық жауапкершілік жүктей отырып, нақты шараларды қолға алсақ дұрыс деп есептеймін.

Шерхан Абзалұлы, тілші:

- Елде құмар ойындарға қарсы күрес жұмыстарының нәтижесінде соңғы 2 жарым жылда 205 жасырын казино жабылған. Бұл іске қатысы бар 224 адам қылмыстық жауапкершілікке тартылыпты. Ал әлеуметтік желіде жаңбырдан кейін қаптаған саңырауқұлақ секілді сілтемелердің санында есеп жоқ. Құзырлы органдар биылдың өзінде 17 мыңнан астамын бұғаттаған. Бұл жай ғана сан емес. Қасіретті таңбасы бар дерек. Сол сілтемеге өтемін деп, жиған-тергенінен, абырой-беделінен, тіпті айрандай ұйып отырған отбасынан айрылғандары қаншама?!

Авторы: Шерхан Абзалұлы