Қазақстанның Ғылым және жоғары білім министрлігіне қарасты Жоғары және жоғары оқу орнынан кейінгі білім комитеті төрағасының міндетін атқарушы Ақерке Абылайхан журналистерге үндеу жасады, деп хабарлайды Skifnews.kz ақпарат порталы.

Ол студенттердің өз-өзіне қол жұмсауы туралы тақырыпты қайта-қайта жазып, егжей-тегжейлі баяндамауды өтінді. Абылайханның айтуынша, соңғы уақытта студенттердің өмірмен қоштасу жағдайлары бір-біріне ұқсап барады.

«Бәрі дерлік биіктен құлап жатыр. Мұндай қайғылы фактілерді егжей-тегжейімен жазу “Вертер әсерін” тудырып, жастарға осылай жасауға болады деген белгі беріп қойғандай әсер қалдырады. Сондықтан нақты сценарийді ашпай-ақ, жалпылап жазған жөн. Қайғыға душар болған отбасылар да “жеке мәліметтерімізді жарияламаңыздаршы” деп өтініш білдіруде», — деді ол.

Ол сондай-ақ құқық қорғау органдары бұл істермен айналысып жатқанын, БАҚ тарапынан артық мәлімет таратуға қажеттілік жоқ екенін ескертті. Ақерке Абылайхан келтірген мысал бойынша, соңғы үш оқиға да бірдей сипатта — студенттер биіктен құлап көз жұмған.

«Осылай істеуге болады дегенді өзіміз көрсетіп жатқандаймыз», — деп қосты ол.