Жамбыл облысында фитосанитарлармен бірге әкімдік қызметкерлері де шегірткеге қарсы күреске жұмылды, деп хабарлайды 24KZ. Арнайы штаб құрылып, улау жұмыстары жүріп жатыр.

Биыл өңірде 107 мың гектар алқапқа үйірлі шегіртке тарауы мүмкін деген болжам бар. Штаб қызметкерлері жәндіктің ошағын анықтауға жәрдем береді. Шегірткеге қарсы жұмыс бір ай бұрын басталды. Зиянкес тараған аумақтың 40%-не химиялық өңдеу жүрді. Облыста үйірлі шегірткенің марокколық, италиян прусы мен азиялық түрі тараған. Оларды жоюға республикалық бюджеттен 460 млн теңге бөлінді.

Нұрби Жігітеков, облыстық аумақтық инспекциясының басшысы:

- Қауіп жоқ деп ойлаймын. Өйткені қазіргі техника толығымен жұмыс атқарып жатыр. Екі ұшақ, 31 жер бүріккіш техникасы және екі дрон. Шегірткені толығымен жою мүмкін емес, 100% орындалмайды. 87-90%-ке дейін орындалады. Жергілікті атқарушы органмен жұмыс жасап жатырмыз. Штаб құрылған. Үйірлі шегірткеге қарсы жұмыс істеуге 360 адам жұмылдырылып отыр.