Ертең – құрылысшылар күні. Мереке қарсаңында Жетісу облысында үздік мамандарға құрмет көрсетілді. Аймақтың инфроқұрылымының дамуына өз үлесін қосқан еңбеккерлерге мемлекеттік наградалар табысталды. Олардың қатарында «Құрмет» ордені, «Ерен еңбегі үшін» медалі, III дәрежелі «Еңбек даңқы» ордені, Премьер-Министрдің атынан алғыс хаттары бар. Еңбегі бағаланып, марапатқа ие болғандардың бірі — Азиз Есмаханов.

Әзиз Есмаханов, «Құрмет» орденінің иегері:

Қалада көпқабатты әлеуметтік тұрғын үйлер салып жатырмыз. 2000 жылдан бері 100 мың шаршы метрден астам баспана пайдалануға берілді. Болашақ, Бірлік, Құлагер, Самал және Шығыс аудандарында құрылыс қарқынды жүргізілуде.

Ал қостанайлық 28 жастағы Яссауи Матышев әке жолын қуып, құрылыс колледжін аяқтаған соң бірден тас қалаушы болып жұмысқа тұрған. Сегіз жыл ішінде 10-нан астам тұрғын үйдің іргетасын қалап үлгерді. Былтыр тасқыннан зардап шеккен Тәуіш ауылындағы жаңа баспаналарды салуға да үлес қосты. Қазір ол қарамағындағы 40 шақты құрылысшының жұмысы мен қауіпсіздігіне жауап беретін білікті маман.

Яссауи Матышев, құрылысшы:

Әкем де құрылысшы. Ол жеке үйлер салады. Соған қарап, мен де құрылысшы болғым келді. Жұмыс ауыр — қарда да, жаңбырда да аспан астында еңбек етеміз. Торғайда екі ай бойы жұмыс істеп, азаматтық борышымызды орындап, әдемі әрі үлкен үйлерді пайдалануға бердік.

Дамир Нұрмұхамет