Кеген — Нарынқол республикалық маңыздағы тасжолда жөндеу жұмыстары басталды.

Бұл жол 30 жылдан бері жөндеу көрмеген. Ой-шұңқырын жыл сайын жамағанмен жолдың сапасы жақсармады. Биыл ауқымды жоба жасалып, тас жол жаңғыртылатын болды.

Ұзындығы 74 шақырым күрежол толық жаңғыртылады. Республикалық маңыздағы тас жол Райымбек ауданын Алматымен жалғап тұр. Қазіргі таңда 15 шақырымы қалпына келтірілді. Қалған бөлігінде жөндеу жұмыстары жалғасып жатыр. Жобаның жалпы құны шамамен 8 миллиард теңгені құрайды. Келесі жылдың соңына дейін халық игілігіне тапсырылуы тиіс.

Берік Дүйсенбаев, Райымбек ауданының әкімі:

- Бұған дейін ондай жөндеу жұмыстары жүргізілмеген. Ойық, ямочный ремонт дейді ғой, сондай жұмыстар жүргізілген. Ол енді сапасы өте нашар болады ғой. Бір шұңқырды жамайды, келесі жылы, бір жаңбырдан кейін оның бәрі кетеді.

Жол құрылысы кезінде өңірде уақытша асфальт-бетон зауыты ашылады. Қажетті материалдар жергілікті жерде өндіріледі. Жоба аясында Кеген мен Райымбек аудандарының тұрғындары жұмысқа тартылады. Қажетті техниканың басым бөлігі өңір кәсіпорындарынан алынады.

Қанат Әбілқайыров, жоба жетекшісі:

- Біз шамамен 110-120 адамды толық жұмыспен қамтамасыз ететін боламыз. Оның ішінде жергілікті халық 20-30 процент құрайтын болады. Оны біз Кеген және Райымбек аудандарының акиматтарымен және управление занятостимен отрабатывать етіп, осы жердегі жергілікті тұрғындарды жұмысқа алатын боламыз.

Әкімдік мәліметі бойынша аудандағы облыстық маңызы бар жолдардың 98 пайызы жөндеуден өтеді. Биыл аудандық маңыздағы жолдардың 85 пайызы жаңартылады.

Гүлім Советқан, Аят Дүйсенбай, Аманжол Жөнкешов