Қазақстан Республикасының Конституциясы – мемлекетіміздің іргесін нығайтудағы қарышты қадамдардың қалыптасуы мен жаңа жүйенің орнығуына серпінді сенім, әділет жолын көрсетер мемлекетіміздің Ата Заңы.

Бұл құқықтық құжат елдің тұтастығын сақтап, байтақ жеріміздің шекарасын мықтап бекітуде, Қазақстандағы ұлттар мен ұлыстардың татулығы мен бірлігіне сызат түсірмей, қауіпсіздігін қамтамасыз етуде Ата Заңымыздың ықпалы зор. Қазақ жерін мекендейтін ұлт өкілдерінің ынтымағының ұйытқысы – Ата Заң. Ол еліміздегі барлық заңдардың бастаушысы.

Қазақстан Республикасының Конституциясының кіріспесінде Ата Заңды қабылдаудың мақсаттары былай түсіндірілген: «Біз, ортақ тарихи тағдыр біріктірген Қазақстан халқы, байырғы қазақ жерінде мемлекеттілік құра отырып, өзімізді еркіндік, теңдік және татулық мұраттарына берілген бейбітшіл азаматтық қоғам деп ұғына отырып, дүниежүзілік қоғамдастықта лайықты орын алуды тілей отырып, қазіргі және болашақ ұрпақтар алдындағы жоғары жауапкершілігімізді сезіне отырып, өзіміздің егемендік құқығымызды негізге ала отырып, осы Конституцияны қабылдаймыз».

Қазақстан Республикасының Конституциясы 1995 жылы 30-тамызда Республикалық референдум өткізу жолымен қабылданды. Конституцияны қабылдай отырып, Қазақстан халқы мемлекеттік биліктің қайнар көзі – өзінің егемендік құқығын баянды етті. Ата Заң қабылданған күн — мемлекеттік мереке «Қазақстан Республикасының Конституциясы күні» деп жарияланды.

Қазақстан Республикасы Конституциясы ең жоғары заңдық күші бар және ол бүкіл аумағында тікелей қолданылады. Оның құрылымы кіріспеден, 9 бөлімнен, 99 баптан, көптеген тармақтар мен тармақшалардан тұрады. Бұның өзі Конституциялық нормалар мен заңдардың басқа нормативтік құқықтық актілердің нормаларынан үстем екендігін көрсетеді.

Құқықтық мемлекеттің қалыптастырылу бағыттары, азаматтардың құқықтары мен бостандықтары, соның ішінде жеке адамның жан-жақты еркіндігі, экономикалық қатынастардың қызмет етуі әлемдік талаптарға сәйкестендірілген. Оның нормалары тұрақты, жалпы мәнде ұзақ жылдарға бейімделіп тұжырымдалған.

Заңға бағыну – тәртіп, ал тәртіп бар жерде тәрбие, тиянақтылық сияқты адамға тән қасиеттер бар. Сол қасиеттер қоғам дамуына негіз болады. Өз Отанын қорғауы, оның заңдарына бағынуы – бұл әр адамның азаматтық жауапкершілігін сезінуі, өз елінің алдындағы азаматтық борышын орындауы. Кеңес Одағының батыры, жазушы Б.Момышұлы: «Тәртіпке бас иген құл болмайды, тәртіпсіз ел болмайды» деген.

Өркендеп дамуымыздың басты құжатына айналған Ата Занды құрметтеу – біздің міндетіміз әрі парызымыз.

Мемлекет пен қоғам тұрақтылығының, болашаққа деген сенім мен халқымыздың ауқатты тұрмысының, лайықты өмірінің кепілі — Ата Заңымыздың мерейі әрдайым үстем болсын!

Балнұр ОРАЗБЕКОВА,

Түркістан облысының Әділет департаменті

әкімшілік бөлімінің бас маманы