Қазақ поэзиясының көрнекті өкілі, жыршы-композитор Иса Байзақовтың туғанына 125 жыл толуына орай туған жері — Ертіс ауданында кең көлемде мерейтойлық шара өтті.

Ақын өзінің әншілік, композиторлық өнерімен қатар «Ақбөпе», «Құралай сұлу», «Алтай аясында» сынды көркем поэмаларымен де ел есінде қалған. Шараға ақынның ұрпақтары, қоғам қайраткерлері, зиялы қауым мен облыс тұрғындары қатысты.

Мерекелік шара «Сарыарқаның дүлділі» атты республикалық ғылыми-тәжірибелік конференциядан басталды. Халқымыздың мәдени мұрасына өлшеусіз үлес қосқан атақты тұлғаның ұрпақтары баба мұрасын қайта жаңғыртқан.

Құралай Байзақова, Иса Байзақовтың немересі:

- Тек қана қазақ тілінде емес, басқа ұлттар да осы Иса Байзақов кім екенін білсін деп орыс тілінде де оның шығармаларын шығарып, Мақпұза Байзақова оның қызы, біздің тәтеміз кезінде орыс тілінде кітап жазған. «Порыв вдохновений» сол кітапты қайта шығарып жатырмыз.

Иса Байзақовтың 125 жылдық мерейтойы ақынның кіндік қаны тамған Ертіс ауданында ұлан асыр тойға ұласты. Тағылымы мол шарада құттықтау хаттар оқылды. Облыс әкімі Асайын Байханов Мәжіліс Төрағасы Ерлан Қошановтың құттықтауын жеткізді. Зиялы қауым Иса шығармаларының құндылығына тоқталды.

Серік Елікбай, ҚР Жазушылар одағы ОФ Төрағасы:

- Иса Байзақов жазба әдебиетімен суырып салмалық өнердің басын қосқан. Яғни синкретті өнердің иесі. Иса Байзақов қазақтың алғашқы кәсіби театры пайда болған тұста соған араласқан адам. Исаның бойында ақындық, Исаның бойында жазбалық, Исаның бойында актёрлық қасиет бар. Жазба әдебиеті Мағжаннан да, Ілиястан да кем емес.

Бұл күні Иса Байзақовтың шығармашылығына арналған үш кітаптың тұсауы кесілді. Көпшілік Исаның желдірмелерін тыңдап, ақындар айтысын, ұлттық ойындар мен бәйгені, қолөнер шеберлерінің көрмесін тамашалады. Ақ боз үйлерде берілген астан дәм татты.

Қарлығаш Қасиетова, Марат Игіліков