Шымкентте заманауи медициналық емхананың құрылысы созбалаңға салынды.

2 жыл бұрын мемлекеттік-жекеменшік әріптестік аясында міндеттеме алған кәсіпкермен келісім шарттың күші жойылды. Салаға жауаптылардың мәліметінше, құрылысты бастауға қаржылық қиындықтар себеп болған. Салдарынан қала іргесіндегі Қайнарбұлақ саяжайы мен тұрғын алабындағы 60 мыңға тарта адам әлі де орталыққа қатынап, ем қабылдауға мәжбүр. Бұл туралы аймақта жұмыс сапарымен жүрген Сенат депутатымен болған кездесуде айтылды. Айгүл Қапбарова жергілікті тұрғындарды тыңдап, шешімін таппаған өзге де мәселелермен танысты. Айтуларынша, апатты деп танылған мектепті бұзу, көшелерді жарықтандырып, көл аумағын абаттандыру аса маңызды. Сонымен қатар құс фабрикасынан шыққан қолаңса иіс қолқаны қабады.

Айгүл Қапбарова, ҚР Парламенті Сенатының депутаты:

- Әлеуметтік әріптестік аясында қазір әкімдік жаңа инвесторларды іздеп жатқан көрінеді. Бұл бойынша біз қосымша тұрғындарға ақпарат береміз. Әрине медициналық көмекке зәру. Сондықтан бұл мәселені тексеру керек. Бақылау керек деп ойлаймын. Көтерілген мәселелердің бәрі сараланады. Әр сұрақ мемлекеттік органдарға жолданады.