Израиль мен Ливан арасында оқ атпау туралы келісім жасалғалы 8 ай өтті, деп хабарлайды 24kz.

Көші-қон жөніндегі халықаралық ұйымның мәліметі бойынша осы аралықта 950 мыңнан астам ливандық Отанына оралған. Бірақ елдегі инфрақұрылымның басым бөлігі қирап қалды. Әсіресе, тас-талқан болған ескерткіштер мен мәдени көрнекі орындарға обал. Адамзат үшін мәні бар нысандар текке күйреді. Десе де, Ливан билігі туризм саласын жақын арада қалпына келтіруге барын салып жатыр.

Ернат Рахметолла, тілші:

- Бұл – Тир қаласындағы мейрамхана. Басқа ғимараттар сияқты ол да Израиль шабуылынан зардап шекті. Терезесі сынып, төбесі мен қабырғасы қираған. Қазір жөндеу жұмыстары қарқынды түрде жүріп жатыр. Жергілікті ескерткіштер де қалпына келтірілу үстінде. Билік қалада 50-ге жуық туристік нысанға зақым келгенін айтады.

Диба Бадави, мейрамхана иесі:

- Көптеген ғимараттардың түкке жарамай қалғаны қынжылтады. Қабырғалары қақ айырылып, терезелі толық түсіп қалған. Біз жөндеуге тырысып жатырмыз.

Тир бай тарихы, сұлу сәулеті мен берекелі базары арқылы туристер арасында өте танымал, тартымды қала болатын. Тіпті 1979 жылы бұл шаһар ЮНЕСКО-ның Бүкіләлемдік мұра тізіміне қосылды. Билік аймаққа туристер қайта ағылады деп сенеді. Әзірге мұнда жергілікті тұрғындармен қоса туған елінен безген палестиналықтар ғана келіп жатыр. Өзге елден әзірге аз.

Альван Шарафеддин, Тир қаласы әкімінің орынбасары:

- Тир – Ливандағы ең басты туристік бағыттың бірі. Мұнда мың жыл бұрынғы археологиялық ескерткіштер сақталған. Әзірге ішкі туризмге ғана белсенді. Соғыс үлкен зардап әкелді. Бірақ бәрі біртіндеп жақсарып келеді.

Алайда елдегі жағдай әлі толық тұрақтала қойған жоқ. Кейде оқ та атылып жатады. Ливандық ұйым – «Хезболла» палестиналық ХАМАС-қа қолдау көрсету үшін Израиль аумағына зымыран атқылайды. Израиль қарап отырған жоқ.

Авторы: Ернат Рахметолла