Шығыс Қазақстан облысында туристік маңызы бар нысандарға апаратын барлық жол жөнделеді.

Жалпы аймаққа жылына жарты миилионға жуық саяхатшы келеді. Бірақ туристік орындарға барар жол нашар болғандықтан жету қиын. Әсіресе атағы алысқа кетсе де, тас жолы жоқ Рахманов кілті секілді таңғажайып табиғат аясына жету азаппен тең. Биыл 13 шақырым жолға асфальт төселіп, мәселе шешіледі, дейді жауаптылар.

“Рахманов кілті” курорттық аймағы теңіз деңгейінен 1760 метр биіктікте орналасқан. Табиғаты тамаша тау басындағы көлді көруге еліміздің әр аймағынан жылда мыңдаған турист келеді. Шипалы суы дертке дауа болғандықтан қайта келетіндердің қатары көп. Солардың бірі Қалдыбала Жолдыбаева.

Қалдыбала Жолдыбаева, Астана қаласының тұрғыны:

- Мақтайды ғой Швейцария деп барып жатады басқа жақтарға. Турция Египет деп барып жатыр. Ол жердерде өзім болсам да, ол жерлерде мынандай табиғат жоқ. Бірақ сонда да жолы болып аэропорты болып туризмді дамытса мына жер Қазақстанды асырайтын жер екен.

«Жол жоқ болғандықтан демалыс аумағына жету бір машақат», — дейді жүргізушілер. Жаңбырлы кезде батпаққа айналып, тау ішінде көлік бұзылып жатады.

Керім Әлкөшеков, жүргізуші:

- 2 рейстен 3 рейстен кезігеді туристер. Шығуға түсуге, өз машиналарымен шыға алмаған соң. Сол кезде біз апарамыз жаман жол болса да. 4вд мпшина болмаса шыға алмайды үстіне, жолда қалып жатады жеңіл машиналар.

Туристік нысанға апаратын жолды жөндеу биыл басталды. Тау-тасты аумақ болғандықтан алдымен 20-ға жуық су өткізгіш құбыр мен дренажды каналдар салынбақ. Жалпы өңірде республикалық маңызы бар 675 шақырым жол жөнделуде. Оның 165 шақырымы Өскемен-Алтай-Рахманов кілті бағытындағы күре жол.

Саяхат Мүсәпіров, жол активтері сапасының ұлттық орталығы ШҚО филиалының бөлім басшысы:

- Анықталған кемшіліктер және басқа сәйкессіздіктер Казроадлаб жүйесіне тіркелеген. Тапсырыс беруші мердігер бәрі көріп отырады. Олар жойылған соң ғана пайдалануға беріледі.

Жыл басынан бері ұлттық сапа орталығының мамандары аталмыш тас жолда 23 рет тексеріс жүргізіп, 9 олқылық анықтады. Жалпы биыл облыста түрлі деңгейдегі маңызы бар 2 мың шақырым жол жөнделіп жатыр.

Мерей Бает, Анель Есенбердина