Алматыда Оңтүстік Кореяның мәдениет күндері өтіп жатыр, деп хабарлайды 24KZ. Айтулы шара екі ел арасындағы мәдени және экономикалық байланысты нығайтуды көздейді. Ұйымдастырушы – Корея Республикасы Елшілігі жанындағы корей мәдени орталығы мен қала әкімдігі.

Korea-Kazakhstan Culture And Trade Week аясында бірқатар іс-шара жоспарланған. Солардың бірі – Кореяны азат етудің 80 жылдығы мен Ұлы ақын Абайдың 180 жылдығына арналған үлкен концерт. Көрермендер үшін екі елдің тарихынан хабар беретін мазмұны бай бағдарлама әзірленді. Алматылықтар мен қала қонақтары корей мәдениетімен жақынырақ танысып, корей ұлттық театрының театрландырылған қойылымын көрді.

Бонг Ко, Корея Республикасы Елшілігі жанындағы корей мәдени орталығының директоры:

- Кореяда Алматыны жақсы біледі. «Табиғаты әсем, халқы қонақжай», – деп айтады. Жалпы Қазақстанның өзі – біздің Орталық Азиядағы басты серіктесіміз. Мұндай іс-шаралар достықты нығайта түседі. Екі елдің экономикалық дамуына да оң әсерін тигізеді. Жоспарлаған барлық шара жоғары деңгейде өтіп жатыр.