Семейде ұлы ақын Абай Құнанбайұлының 180 жылдығына арналған «Абай елі – өнер кеніші » атты көркемөнерпаздар байқауы мәресіне жетті.

Өңірде алғаш рет ұйымдастырылған шара әр ауданда он күнге жалғасты. Облыс әкімдігінің қолдауымен және Мәдениет басқармасының ұйымдастыруымен өткен байқауға өңірдің 10 ауданынан келген мыңға жуық өнерпаз қатысты.

«Абай елі – өнер кеніші» байқауында дәстүрлі ән, күй, би ұсынылды. Гала-концертке облыс әкімі қатысып, Абай елінде өнерге деген құрметтің биік екенін атап өтті.

Берік Уәли, Абай облысының әкімі:

- Жалпы қазақта сөз бар ғой ел іші — өнер кеніші деген. Шын мәнісінде Абай елі өнер кеніші екенін тағы бір мәрте дәлелдеді.

Мыңға жуық өнерпаз ән-күй, терме, театрландырылған көріністер арқылы ұлттық мәдениетті танытты. Олар жеті аталым бойынша марапатталды.

Жанжігіт Омархан, облыстық мәдениет және архив ісі басқармасының басшысы:

- Бұл жалпы шараның мақсаты облысымыздың Абай елінің өнерпаздарын ауылда жүргендерді ауданға, одан бері қарай облысқа, республикаға шығару деген мақсатымыз бар. Мұндай шаралар мәдениетімізді өркендетеді, руханиятымызды нығайтады, мәдениетімізді көтереді.

Сайыс қорытындысында үшінші орынды – Үржар, екінші орынды – Аягөз, ал бас жүлдені Абай ауданы жеңіп алды. Облыс әкімі жеңімпаз аудан мәдениет үйлеріне дыбыс жазу студиясы, музыкалық аппаратура және шағын автобус сыйлады.

Бақытжан Ақанов, Абай аудандық мәдениет тілдерді дамыту және архив ісі бөлімінің басшысы:

- Кеуде, жүрек деген толқыныста тұр. Бұл енді шынында үлкен жеңіс Абай елі үшін. Өйткені қара өлең пайғамбары Абай атамызды, Шәкәрім, Мұхтар аталарымызды іздеп тәу етіп келетін адам көп.

«Абай елі – өнер кеніші» байқауын дәстүрлі түрде өткізу жоспарланып отыр.

Айта кетейік, жалпы Абай облысында 296 мәдениет мекемесі бар. Онда 3000-нан астам адам еңбек етуде.

Рүстем Қайратұлы, Медет Өмірханов