Оңтүстік Кореяда 2026 жылдан бастап барлық мемлекеттік қызметтер онлайн түрде қолжетімді болады , деп хабарлайды 24kz.

Жергілікті үкімет алдына осындай мақсат қойып отыр. Президент жанында жасанды интеллект жөніндегі ұлттық комитет жұмыс істейді.

Владислав Цой, тілші:

- Оңтүстік Корея – цифрландыру деңгейі бойынша әлемдік көшбасшылардың бірі. Жергілікті ауруханаларда қағаз құжаттар пайдаланбайды. Ал биыл мектептерде кітап пен дәптердің саны қысқартылып, электронды оқулықтар енгізілді. Қазіргі таңда бұл жүйе математика, ағылшын тілі және информатика пәндерінде қолданылады. Сонымен қатар бұл ел өндірісте роботтарды пайдалану бойынша көш бастап тұр. Әр он мың қызметкерге бір мың құлтемірден келеді.

2023 жылдан бастап азаматтар ұшаққа билетті төлқұжатсыз алады. Ол үшін арнайы мобильді қосымша арқылы ұшуға 30 минут қалғанда өзінің бетін суретке түсіріп, тіркеп, төлқұжат пен билет мәліметтерін сканерлеу керек. Шетелден келгенде де бақылауда кезекке тұрудың қажеті жоқ, жеке куәлікті сканерлесе жеткілікті. Бұл құжатты өзімен алып жүру міндетті емес, оның электронды нұсқасын телефонға жүктеуге болады.

Чой Тэ Ра, Корея республикасы Ішкі істер және қауіпсіздік министрлігінің цифрлы үкімет бөлімі басшысының орынбасары:

- Оңтүстік Корея Экономикалық ынтымақтастық және даму ұйымының 2020 және 2023 жылдардағы цифрлық ақпарат рейтингісінде екі рет қатарынан бірінші орынға ие болды. Сондай-ақ 2024 жылы Біріккен ұлттар ұйымының электронды үкімет бағалауында онлайн қызметтер санаты бойынша да алғашқы орынды иеленді. Азаматтарға нақты пайдасы тиетін цифрлық қызметтерді кеңейту мақсатында, корей үкіметі «Үкімет 24» атты мемлекеттік портал ұсынады. Бұл платформа түрлі мемлекеттік және әкімшілік қызметтерді біріктіреді.

Мемлекеттік қызметті азамат смартфон немесе компьютер арқылы ала алады. Порталға кіру үшін әлеуметтік желі аккаунты немесе электронды қолтаңба пайдаланылады. Онлайн түрде тұрғылықты мекенжайы, отбасы құрамы, салық төлеу, жылжымайтын мүлік туралы анықтамалар алуға болады. «Үкімет 24» порталы арқылы жәрдемақыға өтініш беруге, баланың туғанын тіркеуге, зейнетақы немесе жұмыссыздық бойынша жәрдемақы рәсімдеуге болады. Пайдаланушы келісім берген жағдайда жеке куәліктің мерзімінің аяқталуы, салық төлеу қажеттілігі сияқты маңызды хабарламалар автоматты түрде ұялы телефонға жіберіледі.

Владислав Цой, тілші:

- Жеке куәліктен бөлек, электронды жүргізуші куәлігі де қолданылады. Сондай-ақ телефонға медициналық және зейнетақы карталарын жүктеуге болады. Келесі жылдан бастап Оңтүстік Корея үкіметі барлық дерек пен қызметтерді біріктіретін жаңа мемлекеттік портал іске қосуды жоспарлап отыр. Бұл жоба мемлекетке жыл сайын шамамен 2 триллион вон немесе 1 миллиард 470 миллион АҚШ доллары көлеміндегі бюджеттік қаражатты үнемдеуге мүмкіндік береді.

Авторлары: Владислав Цой, Ольга Лян