Павлодарлықтар қызметтік борышын өтеу барысында қаза тапқан Ішкі істер органдарының қызметкерлерін еске алды.

Қазақстан полициясы күніне орай ұйымдастырылған шараға ел тыныштығы үшін өз өмірін құрбан еткен азаматтардың ата-аналары мен жақындары арнайы шақырылды. Сонымен қатар Департамент басшылығы, қатардағы полицейлер мен ардагерлер және қоғамдық ұйым өкілдері қатысты. Болат Сармантаевтың ұлы Қанат Сармантаев 1996 жылы, небәрі 23 жасында қаскөйлердің қолынан қаза тапқан. Қария «полиция формасын киген жастарды көргенде ұлымды көргендей боламын» деп еске алады.

Болат Сармантаев, Павлодар қаласының тұрғыны:

- 1996 жылы 3 шілде күні хабар келді. Солай «Кристалл» дүкенінің қасында атып кетті деп. Соны білемін мен. Содан бері міне балам жоқ, баламның жоқтығын білдірмей жылда шақырады бір-екі қабат. Шақырғанына рахмет. Енді ондай оқиға болмасын мәңгіде, тыныштық болсын. Мына өсіп келе жатқан жас жігіттер дәрежесі өссін, бақытты болсын.

Лаура Байбек, Павлодар облысы ПД Тәрбие және кадр басқармасы бастығының орынбасары:

- Тәуелсіздік жылдары Павлодар облысында қызметтік міндетін атқару барысында сегіз әріптесіміз қаза тапты. Олар учаскелік полиция инспекторлары, жедел уәкілдер. Бұл ел тыныштығы жолындағы ауыр, бірақ абыройлы миссия. Жас буын, жас қызметкерлеріміз осы ерлікті ешқашан ұмытпаса екен дейміз. Құрметтеп, олардың рухына тағзым ету біздің ортақ парызымыз.