Астанадағы тұрғын үй кешендерінің бірінде қанды оқиға болды. Ер адам қызды пышақтап, кейін оның інісіне де шабуыл жасаған, — деп хабарлайды Massaget.kz тілшісі.

Болжам бойынша қызға бұрынғы жігіті шабуыл жасаған. Пәтерден айқай естілген, кейін ер адам қолындағы пышақпен көшеге жүгіріп шығып, қыздың інісін жаралаған. Пышақ жарақатын алған жасөспірімді куәгерлер балалар алаңында жатқан жерінен тапқан. Оқиға орнынан түсірілген видео әлеуметтік желіге жарияланды.

Астана Денсаулық сақтау басқармасы мәліметінше, 2009 жылы туған жасөспірім пышақ жарақатымен жедел хирургия бөліміне жеткізіліп, ауруханаға жатқызылған. Жасөспірім тірі, бірақ жағдайы ауыр.

Өкінішке қарай, оның әпкесі көз жұмды.

"Оқиға орнында зорлық-зомбылық белгілері бар қыздың мәйіті табылды. Сондай-ақ, оның кәмелетке толмаған інісі зардап шеккен, ол пышақ жарақатымен ауруханаға жеткізілді. Қазір оқиғаның барлық мән-жайы анықталып жатыр", – деді Астана Полиция департаментінің баспасөз қызметі өкілі.

Ведомство мәліметінше, күдікті ұсталып, уақытша ұстау изоляторына қамалды.

Еске салайық, бұған дейін Астанада қылмыс жасап, 25-қабаттан секіріп кеткен адам аман қалғаны хабарланды.

Өзекті жаңалықтарды өз уақытында оқу үшін Facebook парақшамызға жазылыңыз!