Сенат қабылдаған заң жобасы көлеңкелі сауданы тыйып, баспана нарығынның жұмысын реттейді. Қазақстанның құрылысшылар одағы төрағасының орынбасары Жанна Бектемірова осылай деді.

Заң жобасы үлескерлердің құқығын қорғаумен қатар құрылыс компанияларына қатысты бірқатар талапты жеңілдетеді. Мәселен, тәжірибе мерзімі мен құрылыс көлеміне қойылатын шекті нормалар төмендетілді. Ал қажетті құжаттар саны екі есе қысқартылды. Сонымен қатар бақылау күшейтілді. Алдын ала келісімшарттар жасауға, рұқсатсыз құрылысты жарнамалау мен баспананы қолма-қол ақшаға сатып алуға тыйым салынды. Үлескерлердің ақшасын заңсыз тартқандарға айыппұл қарастырылған. Осы және басқа да өзгерістер бүгін «Атамекен» Ұлттық кәсіпкерлер палатасында талқыланды. Жиынға Қазақстанның барлық құрылыс компаниялары, қауымдастықтар мен прокуратура өкілдері қатысты.

Жанна Бектемірова, «Қазақстанның құрылысшылар одағы» төрағасының орынбасары:

- Үлестік қатысумен баспана алу үшін келісімшарттар тек электронды түрде болады. Қолма-қол ақша төлеу деген болмайды. Бәрі бақылауда болады. Ең бастысы, құрылыс жүргізуге кепілдік алған компаниялар ғана баспаналарды үлескерлерге сата алады. Кепілдігі бар мекемелердің бәрі тұрғын үй құрылысына қатысты ортақ порталға қосылады. Оны растайтын құжаттар үлескерлер үшін электронды түрде қолжетімді болады. Келісімшарттар ортақ үлгімен дайындалады.

Данияр Молкенов, «Атамекен» ҰКП Құрылыс және жер қатынастары департаментінің директоры:

- Сенат мақұлдаған заң жобасы үлескерлердің құқығын қорғайды. Сонымен қатар құрылыс компанияларына үлескерлердің қаржысын пайдалануға әкімдіктерден рұқсат немесе кепілдік алуға мүмкіндік береді. Бүгін осы құжаттағы өзгерістерді талқыладық. «Қазақстан тұрғын үй компаниясының» мәліметінше, бүгінде құрылыс компанияларының 30%-і ғана заң талаптарына сай жұмыс істейді. Ал жаңартылған заң күшіне енген соң олардың саны 60-70%-і жетеді деп ойлаймыз.